"Navbahor" va "Paxtakor"ning Namangandagi o‘zaro o‘yinlarida tenglik. Bu gal kim g‘alaba qozonsa, o‘sha oldinga o‘tib oladi

Superliga ikkinchi davrasini "Paxtakor" Namanganda "Navbahor"ga qarshi o‘yin bilan boshlaydi. "Paxtakor" matbuot xizmati uchrashuvga oid ma’lumotlarni taqdim etdi.

Jamoalar tarkibida kartochkalar bilan bog‘liq diskvalifikatsiya yo‘q. Ushbu jamoalar chempionatlar doirasida barcha mavsumlarda ishtirok etib kelmoqda. Yuqori ligada eng ko‘p to‘qnashuvlar shu ikki klub o‘rtasida kuzatilgan.

Hozirga qadar jamoalar 59 uchrashuvda maydonga tushgan. O‘zaro o‘yinlar bo‘yicha ustunlik yaqqol "sherlar" tarafida. 37 bahsda zafar quchgan "Paxtakor" 9 bor raqib bilan durang o‘ynagan va 13 marta imkoniyatni boy bergan. "Navbahor" darvozasiga 100 gol urilib, 46 to‘p o‘tkazib yuborilgan. 9 bahsda "sherlar" yirik hisobda ustun kelgan. Ayni paytgacha Namanganda bo‘lib o‘tgan 29ta bahsning 12tasida toshkentliklar zafar quchgan bo‘lsa, 5 o‘yin durang bilan tugagan. Qolgan 12 uchrashuv raqib g‘alabasi bilan yakunlangan. Namanganda "Paxtakor" 33 to‘p kiritib, 27 gol o‘tkazib yuborgan. O‘tgan yilgi bellashuvda Doston Hamdamovning yagona goli safarda "sherlar"ga yutuq keltirgan.

Ushbu jamoalarning o‘zaro o‘yinlari tarixida qayd etilgan eng yirik hisob - 7:0. Ushbu natija 2009 yili Toshkentda bo‘lib o‘tgan uchrashuvda qayd etilib, unda “Paxtakor” zafar quchgandi.

O‘zaro o‘yinlarda eng ko‘p to‘p kiritgan futbolchi Aleksandr Geynrix hisoblanadi. U jami 9 marta namanganliklar darvozasiga gol urgan. Leonid Koshelev esa 7 ta to‘p kiritgan. Shundan 3tasini "Navbahor", 4tasini "Paxtakor" safida urgan. Igor Sergeev hozircha bu raqib darvozasini 6 bor ishg‘ol qilgan. Poytaxtliklardan Igor Shkvirin, Anvar Soliev, Zayniddin Tojiev va Odil Ahmedov 4tadan to‘p kiritgan. "Navbahor"dan Shuhrat Mirxoldirshaev hisobida 4, Oleg Shatskix hisobida 3 gol mavjud. Koshelevdan tashqari Vadim Kotelnikov ham har ikki jamoa safida gol urishga erishgan.

“Navbahor” va “Paxtakor” jamoalari o‘rtasidagi o‘yin 1 sentyabr kuni 19:00da Namangandagi "Markaziy" stadionda boshlanadi.