Бугун про-лиганинг 18-турида Фарғонада “Нефтчи” – “Бухоро” иштирокида марказий ўйин бўлиб ўтди.

Кескин курашлар остида кечган учрашувда майдон эгалари 2:0 ҳисобида ғалаба қозониб, Суперлига учун яна бир қадам яқинлашди.

“Нефтчи” бош мураббийи Илҳом Мўминжонов учрашувдан кейин ўз фикрлари билан ўртоқлашди.  

- Бугунги қозонилган ғалаба билан футболчиларни ҳамда мухлисларимизни табриклайман. Айтиб ўтиш лозим, бугунги ўйин анча қийин кечди. Йигитларимиз яхши ҳаракатлари билан бирга мураббийлар томонидан қўйилган вазифа ва кўрсатмаларни уддалаган ҳолда, чиройли ғалабани қўлга киритиб, очколар сонини оширишга муваффақ бўлишди. Биринчи босқич баҳслари якунига етди. Энди эртага бўлиб ўтадиган қуръа ташлаш маросимидан сўнг иккинчи босқич учрашувларига тайёргарликни бошлаб, очколар йиғишда давом этамиз.

Достон Тошматовга келсак, у маҳоратли ўйинчи. Ўтган йилги мавсумда чиройли ўйини ва голлари билан ўзини нималарга қодир эканлигини исботлаб берди. Бугун гарчи ўйин охирида тушган бўлса ҳам кейинчалик унга аста-секин имконият берамиз. Лекин ҳозирги кунда жамоамизда рақобат кучли бўлганлиги туфайли тўпураримиз Марко Обрадовични майдонга туширмоқдамиз. Шуни эвазига Достон захира ўриндиғида қолиб кетмоқда. Аммо, қайтараман, кейинги ўйинларда унга албатта имкон бериб, ўйнатишга ҳаракат қиламиз.

U-18 ёшлар жамоамиз бугунги кунда биринчиликда пешқадамлик қилиб келмоқда. Жамоада иқтидорли ёшлар борлиги бежизга эмас. Олдимизга қўйилган вазифаларни уддаласак, ёшларимизни ҳам ўйинларга жалб қиламиз, - дейди Илҳом Мўминжонов.

"Нефтчи" матбуот хизмати.

Матнда хатолик топсангиз, ўша хатони белгилаб, бизга жўнатинг (Ctrl + Enter)

Комментарии

Для написания комментариев пройдите авторизацию