"Нефтчи"нинг Анталиядаги йиғинига Европадан мутахассислар жалб қилинди. Бош мураббий яна нималарни айтди?

“Нефтчи” клуби янги мавсумга тайёргарликнинг асосий босқичини Туркиянинг Анталия шаҳрида олиб бораётганидан хабарингиз бор.

Ислом Исмоилов бошчилигидаги фарғоналиклар мамлакатнинг амалдаги чемпиони сифатида 2026 йилги мавсумда ҳам ўз олдига жиддий мақсадларни қўйишмоқда.

Бош мураббий клуб матбуот хизматига Анталиядаги биринчи босқич якуни бўйича фикрлари билан ўртоқлашди.

“3 январдан 20 гача Анталияда биринчи босқич ўқув-машғулотларини якунладик. Бу босқич биз учун жуда муҳим эди. Ўйлайманки, биринчи босқичда олдимизга қўйган барча режаларни бажара олдик. Дастлабки босқичда асосий вазифамиз узоқ танаффусдан кейин футболчиларнинг жисмоний ҳолатини тиклаш ҳамда ўйин моделини шакллантириш ва жамоани уч йил давомида ҳаракат қилган 5-3-2 схемасидан 4-3-3 схемасига ўзгартириш бўйича бир қанча ишларни олиб бордик.

Бу йиғинда учта ўртоқлик учрашувини ўтказдик. Биринчи ўйин “Қорабоғ”га қарши ўтди. Бу рақиб Европа Чемпионлар лигасида ва умуман ўзи қатнашаётган барча мусобақаларда муносиб иштирок этяпти, кучли жамоа. Бу клубга қарши етарлича камчиликларни кўриб олдик. Тўғри, йиғин бошидаёқ бундай кучли жамоаларга қарши ўйнаш албатта жамоа учун қийин бўлади. Осон ўйин ўтмади. Лекин мақсадимиз ўртоқлик ўйинларида ғалаба қозониш эмас, балки жамоани камчиликларини кўриб олиш бўлгани учун кучли рақиб танлашга қарор қилдик. Бу жамоа фойдасига хизмат қилди, деб бемалол айта оламан. Агар яна 3-4 мартадан “Қорабоғ”га қарши ўйнаш керак бўлса, мен ўйнаган бўлардим. Ўртоқлик ўйинларидан мақсад жамоа ҳолатини аниқлаб олиш. Ундан кейинги иккита ўйинда жамоамиз ғалаба қозонди. Бу учрашувларда биз аста-секинлик билан ўзимиз хоҳлаётган ўйин услубини кўрсатишни бошладик.

Яна бир хурсанд қиладиган ҳолат шундаки, машғулотларда футболчиларни ишга бўлган профессионал муносабати мураббий сифатида мени қувонтиради. Барча бирдек меҳнат қиляпти. Албатта, ўйинчилар ҳам янги ғояларимизни, биз хоҳлаётган кўрсатмаларни бажариш учун машғулотларда тинимсиз меҳнат қилишяпти.

24 январдан жамоамиз иккинчи босқичга киришади. Бунда 5 та ўртоқлик учрашувини ўтказиш кўзда тутилган. Бундан ташқари, бу босқичда Европадан мутахассисларни жалб қилдик ва футболчиларимиздан махсус тестлар олинади. Ҳозирда ўйинчиларни ҳолати қандай, келгусида қандай ишларни амалга ошириш мумкин, умумий жисмоний ҳолати бўйича маълумотларни олиш бўйича Европадан мутахассисларни жалб қилганмиз. Иккинчи босқичда умумий эътиборни ўйин услубини ривожлантиришга қаратамиз. Сабаби, мавсумга оз қоляпти. Шунинг учун бор эътиборимиз жамоанинг ўйин услубини кучайтиришга қаратилади. Аста-секинлик билан барча ишларни амалга ошириб боряпмиз. Асосий мақсадимиз мавсумга тайёр, интизомли ва тартибли ҳолатда етиб келиш”.