Неймар жамоамга қадам босмасин!

“Барселона” раҳбарлари орасида машҳур юлдуз Неймарни клубга қайтаришга уринаётган мутасаддилар бор.  Бразилиялик футболчининг ўзи ҳам 2026 йилги жаҳон чемпионатигача Европада тўп тепиш ниятида эканини билдирган.

Бироқ, “Барселона”ни Ла Лига пешқадамига айлантирган Ханс-Дитер Флик Неймарнинг клубга келишига “тиш-тирноғи” билан қаршилик кўрсатяпти.

Неймар айни пайтда “Сантос” ўйинчиси ҳисобланади. Саудия Арабистонидаги муваффақиятсиз мавсум ва оғир жароҳатлар туфайли юқори спорт формасини йўқотган Неймар Европага қайтиб, яна ўз даражасига кўтарилишни мақсад қилган.

Гарчи Каталония клубида 33 ёшли юлдузнинг тарафдорлари кўп бўлса-да, Фликнинг позицияси бу трансферни қийинлаштириб юборади. Жамоа германиялик мураббий қўл остида зўр ўйнаётгани эса, клуб раҳбарияти Фликнинг талабларига қарши бормаслигини англатади.