Нима?! АПЛда ВАР бекор бўлиши мумкин. Ушбу масала ёзда кўриб чиқилади

Англия Премьер-лигаси клублари июнь ойида бўлиб ўтадиган умумий йиғилишда кейинги мавсумдан бошлаб ВАРни бекор қилиш таклифини овозга қўймоқчи. Бироқ АПЛ раҳбарияти бу таклифга қарши. 

"The Athletic" хабарига кўра, "Вулверхэмптон" ВАРни бекор қилиш ғоясини илгари сурган. 6 июнь куни бўлиб ўтадиган йиғилишда клуб вакиллари бундай қарорни ёқлаб ёки қарши овоз беришади. 

"Бизнинг аниқлик учун қилаётган ҳаракатларимиз ва тўлаётган пулларимиз футбол руҳига зид. Шунинг учун 2024/25 йилги мавсумдан бошлаб ВАРни бекор қилишимиз керак. Ушбу масалани муҳокама қилиш тўғрисидаги қарор Премьер-лига PGMOL (профессионал ҳакамлар гуруҳи) ва бошқа рақибларимизни ҳурмат қилган ҳолда кўриб чиқилганидан сўнг қабул қилинди", - деди "бўрилар". 

ВАР 2019 йилдан буён Англиянинг топ-лигасида қўлланиб келинади. 2023/24 йилги мавсумда жамоалар ва мухлислар орасида ВАРни танқид қилиш ҳолатлари кучайди. Бунга тинимсиз вужудга келаётган баҳсли вазиятлар сабаб бўлмоқда. Жумладан, "Ливерпуль" бир неча бор PGMOL'га мурожаат қилишган. Бундан ташқари, "Арсенал" ва "Ноттингем Форест" каби клублар ҳам расмий айбловлар билан чиқишган. 



Апрель ойида Швеция ВАР тизимидан воз кечган биринчи давлатга айланди. Швеция футбол ассоциацияси президенти Фредрик Рейнфелдтнинг айтишича, ички мусобақалар ВАР тизимисиз ўтказилади. Сабаби 32 жамоадан 18 таси бунга қарши чиққан. 

Премьер-лига клублари регламентга ўзгартиришлар киритиш ҳуқуқига эга ҳисобланади. Бунинг учун клуб вакилларининг учдан икки қисми овоз бериши талаб этилади. АПЛ раҳбарияти ВАРнинг бекор қилиниши ҳакамларнинг хатолари кўпайишига олиб келади ва лига имиждига салбий таъсир кўрсатади, деб ҳисобламоқда. 

Журналист Бен Жейкобснинг хабарига кўра, топ-6 клублар ВАРни сақлаб қолиш учун овоз бериш ниятида. Клублар технология тўсиқ эмас, балки ёрдам деб ҳисобламоқда. 

Чемпионат якунига бир тур қолганда "Манчестер Сити" 88 очко билан турнир жадвалида пешқадамлик қилмоқда. Иккинчи ўриндаги "Арсенал"да 86, "Ливерпуль"да эса 79 очко мавжуд. 

Қуйидаги суратда ВАРдан энг кўп "азият" чеккан клублар ҳамда ВАР қароридан фойда кўрган клубларни кўришингиз мумкин: 
 



 

 



Карим Худайқулов