Нодирбек Абдусатторов: "Мен бу турнирга Магнус Карлсен сабаб келдим"

Нодирбек Абдусатторов: "Мен бу турнирга Магнус Карлсен сабаб келдим"

Швециянинг Мальмё шаҳрида TePe Sigeman нуфузли ёпиқ классик турнири бўлиб ўтмоқда. Унда дунёнинг кучли гроссмейстерлари ўзаро баҳс олиб боради.

Эътиборлиси, мазкур мусобақада ҳамюртимиз Нодирбек Абдусатторов ҳам иштирок этиб, илк турда Жу Жинерни мағлуб этди. Абдусатторов ғалабадан сўнг интервью бериб, қуйидаги фикрларни билдирди.

— Нодирбек, ҳар доим мусобақани тезкор ғалаба билан бошлаш ёқимли. Бугун нима содир бўлди, деб ўйлайсан?

"Дебют танлови мен учун энг муҳим қарор бўлди, деб ўйлайман. Унинг партияларини ўрганганимда, у асосан e4 ўйнашини ва яхши дебют репертуарига эга эканини кўрдим. Менимча, Каро-Канн у учун бироз кутилмаган қарор бўлди — эҳтимол, у c5 ёки e5 ни кутган. Унинг Каро-Каннга қарши асосий варианти e5 эканини пайқадим, бу эса қораларга деярли ҳар доим Bf5 билан ўйин беришини англатади. Буни амалиётда яхши қарор деб билдим. Партия давомида ҳам қораларда ҳеч қандай муаммо бўлмади. Айниқса Rc1, Bb4дан кейин у c3 ўйнаши керак эди. Оддий Be7, c4 ва у ерда назария бор. У Qe1 ўйнаганидан кейин мен алмашдим ва рокировкадан сўнг фақат қоралар ўйинни давом эттира оладиган ҳолатга келди."

— Кўпчилик учун қизиқ: оқларда d2да “ёмон” фил, сенда эса яхши, лекин сен уни алмаштиришдан мамнунсан. Буни тушунтириб берасанми?

"Оқларда майдон устунлиги бор, шунинг учун қоралар учун имкони борича кўпроқ фигура алмашиш фойдали. c3 ғояси — қора фигураларни чеклаш. Кейин оқлар аста-секин c4 ёки g4 орқали ўйнайди. Бу шундай позициялар учун умумий принцип. Шунинг учун у Qe1 ўйнаганда мен алмашдим ва рокировка қилдим. Фигуралар сони камайди, лекин қолган фигуралар учун майдон кўпайди ва аниқ режа пайдо бўлди — c5 ўйнаш. Буни амалга оширишга эришдим. Кейин у цейтнотга тушиб қолди ва Nd4, менимча, тушунарсиз хатолик бўлди. Балки у Rc8дан кейин Qb3 ўйнамоқчи бўлган, лекин d4даги от осилиб қолганини пайқамаган."

— Сен кетма-кет учта турнирда ғалаба қозондинг: Лондон, Вейк-ан-Зее ва Прага. Бу ерда ҳам яхши бошладинг. Бу форманинг сири нимада?

"Яна Grenke ҳам бор — у фристайл, лекин барибир классик шахмат. Мен шунчаки барқарор бўлишга ҳаракат қиламан. Бу йил Grand Chess Tourда қатнашмаяпман, шунинг учун бошқа турнирларда ўйнаш керак. Бу ерга эса Магнус сабаб келдим. У иштирок этаётганини эшитганим заҳоти келишга рози бўлдим. Демак, мен бу ердаман — айнан Магнус учун."

— Қайси турда ўйнайсизлар?

"Учинчи турда."

— Қайси рангда?

"Қоралар билан."

— Бу ноқулай эмасми?

"Йўқ, бунинг ҳам ўз афзалликлари бор — менда ортиқча босим бўлмайди. Шунинг учун бу ҳам яхши натижа бўлиши мумкин. Кўрамиз."