Нодирбек Якуббоев ҳиндистонлик шахматчи билан учрашиб, унга гул ва ширинлик совға қилди

Хабарингиз бор, айни кунларда Нидерландияда "Tata Steel Chess-2025" турнири бўлиб ўтмоқда. Унда юртимиздан Нодирбек Абдусатторов "Masters" ва Нодирбек Якуббоев "Challengers" иштирок этмоқда.

Нодирбек Якуббоев турнирнинг тўртинчи турида ҳиндистонлик Рамешбабу Вайшали билан дона сурган эди. Ушбу баҳс олдидан Якуббоев рақибасининг қўлини сиқиб қўймагани ижтимоий тармоқларда кўплаб муҳокамаларга сабаб бўлган эди.

Ушбу вазиятдан сўнг Нодирбек Рамешбабу Ваишали билан учрашиб, самимий суҳбат қурди ва тушунмовчиликни бартараф этиш мақсадида унга гуллар ва ширинлик совға қилди. Якуббоев "ChessBase India"га берган интерьвюсида шундай деди:  

"Нафақат биз шахматчилар, балки Ўзбекистон ва Ҳиндистон халқлари ҳам дўстона муносабатда бўлишини истайман.  Бўлиб ўтган воқеа учун узр сўрайман. Бу иккаламиз учун ҳам ноқулай вазият бўлди. Мен сизни, укангизни ва барча ҳинд шахматчиларини ҳурмат қиламан, - деди 23 ёшли гроссмейстер.