Ўзини босолмай қолган "Ливерпуль" дарвозабони жаримага тортилди

«Ливерпул» дарвозабони Алиссон Бекер интизомий жаримага тортилди. Англия чемпионати доирасида «Ноттингем Форест»га қарши ўйиндан сўнг бразилиялик посбон 8 минг фунт миқдорида жарима тўлайдиган бўлди.

Учрашув дуранг билан якунланганидан кейин Алиссон майдонни тарк этаётганда ҳис-туйғуларини жиловлай олмади. Ҳакамнинг якуний ҳуштагидан сўнг у бир неча бор захира ҳакамлар қўлидаги алмашинувлар ҳақида хабар берувчи электрон таблоларни оёғи билан тепди.

Бу ҳолат мусобақани назорат қилувчи интизомий органлар эътиборидан четда қолмади. Қоидаларга биноан, бундай хатти-ҳаракат спортчига нисбатан молиявий жаза қўлланишига сабаб бўлади ва Алиссонга 8 минг фунтлик жарима тайинланди.

Эслатиб ўтамиз, Алиссон Бекер 2018 йилдан бери «Ливерпуль» шарафини ҳимоя қилиб келмоқда. У бу жамоага Италиянинг «Рома» клубидан ўтган эди.