ЎФА ва ЎзПФЛ раҳбарияти Суперлига жамоалари вакиллари билан йиғилиш ўтказди

Ўзбекистон футбол ассоциациясида янги мавсум олдидан Суперлига жамоалари вакиллари иштирокида йиғилиш бўлиб ўтди.

Бугун ЎФА ҳамда ЎзПФЛ раҳбарияти иштирокида ташкил этилган мазкур учрашувда янги мавсумга тайёргарлик жараёнлари, регламент талаблари, инфратузилма масалалари ва бир қатор муҳим йўналишлар муҳокама қилинди.

Йиғилиш давомида клубларга инфратузилмани доимий равишда яхшилаб бориш, академиялар ва аёллар футболини ривожлантиришга эътибор қаратиш, шунингдек, клублар фаолиятини профессионал тарзда ташкил этиш масалалари яна бир бор эслатиб ўтилди.

Шунингдек, мутасаддилар томонидан жамоалар вакилларининг саволларига батафсил жавоб берилди ҳамда янги мавсумни юқори савияда ўтказиш бўйича тегишли тавсиялар билдирилди.