Оладиган борми? “Бавария” машҳур футболчисини трансферга қўйди!

“Бавария” мутасаддилари клубнинг франциялик легионери Кингсли Команни трансферга қўйди. Бу ҳақда L’Equipe нашри хабар берди.

Манбага кўра, клуб раҳбариятига 28 ёшли ҳужумкор футболчининг кейинги пайтда кўп жароҳат олаётгани қониқтирмаган.

Улар янги бош мураббий Венсан Компани янги мавсумда Кингслига имконият бермайди ва унинг ўрнига янги ўйинчи Майкл Олисени ўйнатади, - деган қарорга келган.  

Якунланган мавсумда Кингсли Коман барча турнирларда 27 та учрашувда майдонга тушиб, бешта гол ва учта ассист билан кифояланди.

Унинг клуб билан шартномаси 2027 йилнинг ёзигача тузилган ва трансфер суммаси бугунги кунда 50 миллион еврони ташкил қилмоқда.