Осимхен топ-клуб уни қандай алдаганини айтди

Айни пайтда Туркия Суперлигасида “Галатасарой” клуби шарафини ҳимоя қилаётган нигериялик ҳужумчи Виктор Осимхен Италиянинг “Наполи” клубини тарк этишига сабаб бўлган омиллар ҳақида гапирди.

Унинг айтишича, клуб раҳбарияти унга берган айрим ваъдаларини бажармаган.

- Бундай ҳолат юз берганидан афсусдаман. Айниқса, клуб раҳбариятидан ҳеч қандай тушунтириш ололмаган мухлислар учун жуда ачинаман. Айрим фанатлар нима бўлганини сўраш учун ҳатто уйимгача келишган.

Айтишим керакки, тик-токда ўша видеолар чиқарилганидан кейин орамизда нимадир узилди. Ҳар ким хато қилиши, пенальтини ура олмаслиги мумкин. Бу футболчи устидан кулги қилиш учун сабаб эмас. Мени ирқий асосда ҳақорат қилишди, ҳолбуки клуб раҳбарияти бундай бўлмаслигини ваъда қилган эди.

Раҳбарият мен кетмоқчи эканимни билганидан кейин менга худди итга ўхшаб муносабатда бўлишди, - деди Виктор Осимхен.