Ўз уйида "меҳмон" ёхуд Суперлиганинг ушбу тури тарихда қолади...ми?

31 октябрь куни Суперлиганинг 23-турига старт берилади. 3 ноябрга қадар давом этадиган тур учрашувларига доимгидек қизиқиш ва эътибор катта. Бу турда Ўзбекистон чемпионатининг жорий мавсумдаги чемпиони расман эълон қилиниши мумкин.

31 октябрь

18:15. “Пахтакор” – “Андижон”

“Шерлар” ва “Бургутлар” ўртасидаги тўқнашувга қизиқиш катта. “Пахтакор” ўтган турда сафарда “Қизилқум”га 2:0 ҳисобида ютқазиб, мухлисларини ранжитиб қўйди. “Андижон” эса ўтган турда “Бобур арена”да “Олимпик”ни мағлуб этиб, иккинчи даврадаги илк ғалабасини тантана қилди. “Пахтакор” – “Андижон” ўртасидаги ўйин ҳақиқий жангга айланиши табиий. Иккаласини мақсади ғалабадан бошқа нарса эмас.

1 ноябрь

16:00. “Локомотив” – “Насаф”

Бу “Насаф” учун тарихий учрашувга айланиши мумкин. Боиси, “Аждарлар” “Локомотив”ни енгса муддатидан илгари ўз тарихида биринчи марта чемпионликни расмийлаштиради. Шунинг учун Рўзиқул Бердиев ва унинг жамоаси Тошкентда ўтадиган учрашувда қандай бўлмасин уч очкони қўлга киритиб, Ўзбекистон чемпиони деган шарафли номни қўлга киритмоқчи. Фаворит шубҳасиз “Насаф” ва уларга бундай пайтда ортиқча мотивацияни кераги ҳам йўқ. 99 фоиз чемпионликни нақд қилган жамоа агар “Локомотив” билан ўйинда буни 100 фоизга ҳал қила олмаса, балки кейинги учрашувда ҳал қилиши табиий. Лекин ушбу турда сиз билан биз “Насаф”ни чемпионлигини кўришимиз мумкин. “Локомотив” қанчалик қаршилик кўрсатаркин? Буни ҳам кузатамиз.

18:15. “Сўғдиёна” – “Сурхон”

Жиззахда яхши ўйин бўлади. Медаллар учун жиддий курашаётган “Сўғдиёна”га ғалаба ҳар қачонгидан зарур. Бунинг учун Иван Бошкович жамоаси қайсар – “Сурхон”ни енгиши талаб этилади. Аммо биламизки, Термиз жамоаси асло осонликча енгиладиганлардан эмас. “Сурхон” сафарда албатта мезбонларга ҳақиқий бош оғриғи бўла олади. Бу жамоани Жиззахдан очко билан қайтишга салоҳияти етарли. Бир-бирига ўхшаш жамоалар десак ҳам янглишмаган бўламиз. Ғалаба иштиёқида майдонда аёвсиз кураш кечиши аниқ.

2 ноябрь

15:00. “Олимпик” – “Навбаҳор”

Ёш “Олимпик” бу турда тажрибали “Навбаҳор”ни қабул қилади. Шубҳасиз, ном ва ўйин бўйича наманганликлар фаворит. “Олимпик” иштиёқ ва шижоат эвазига нимадир қилиши мумкин. Агар очко оладиган бўлса ҳам бу энди ажабланадиган ҳолат эмас. “Навбаҳор” ўз тажрибасидан фойдаланадиган бўлса, ғалабани илиб кетади.

17:15. “Қизилқум” – “Динамо”

“Пахтакор”ни 2:0 ҳисобида мағлубиятга учратиб кичик сенсация қайд этган “Қизилқум” бу гал “Динамо”ни қабул қилади. Биласиз, Самарқанд жамоаси 22-турда Самарқандда “Насаф”ни қабул қилди ва охирги дақиқаларда “оғзидаги ош”ни олдириб қўйди. 1:0 ҳисоби якунда 1:2 га ўзгариб кетди. Жамшид Саидов жамоаси “Пахтакор”ни енгиш орқали потенциали ҳамон юқори эканини кўрсатди. Агар шу ўйинини яна такрорласа “Динамо”га ҳам оғир бўлади.

3 ноябрь

16:00. “Нефтчи” -  “Бунёдкор”

Фарғонада “Нефтчи” “Бунёдкор”ни қабул қилади. Турнир жадвалидаги хавфли зонадан узоқлашиш ҳаракатида юрган “Қалдирғочлар”ни меҳмонда жиддий ўйин кутаётгани бор гап. Аммо шуни ҳам унутмаслик керакки, “Бунёдкор” иккинчи даврада анча қўшди ва энди рақибларига муаммолар туғдиряпти. “Нефтчи” эҳтиёткорликни йўқотадиган бўлса, Зейтуллаев жамоаси кечирмаса керак. Ўтган турда ОКМК майдонидан уч очко билан қайтган “Нефтчи” ҳозир яхши кайфиятда.

18:15. “Металлург” – ОКМК

Қизиқ, ОКМК бу сафар ўз уйида меҳмон ролида. “Металлург” уй учрашувларини ОКМК стадионидан номинал мезбон сифатида фойдаланиб келаётганини биласиз. Бу турда эса “Металлург” билан ОКМК беллашади. Шунинг учун ОКМК ўз уйида меҳмон, “Металлург” эса Олмалиқда мезбон. Барибир бу шунчаки расмиятчилик. Миржалол Қосимов жамоаси ўз уйида мухлислари қаршисида тўп суради ва фаворит ОКМК клубидир. Рости, “Металлург” про лигага тушиб кетиш учун биринчи рақамли даъвогар. Жамоа кўрсатаётган ўйиндан келиб чиқиб айтадиган бўлсак, имконияти жуда паст. Аммо бу дерби. Агар ОКМК рақиб кучига етарлича баҳо бермаса ўзига қўшимча муаммолар пайдо бўлади.

Шуҳратбек Жўраев.