Ўзбек боксчиларини хушламайдиган “наҳанг” промоутерлар, рақибга азоб беришни хоҳлайдиган Бектемир, Мадримовнинг ҳеч кимга айтмаган сирли ўтмиши ва бошқалар ҳақида

АҚШнинг боксга ихтисослашган энг нуфузли нашрларидан бири (пулли нашр албатта, ахир бу Америка!) Калифорнияда фаолиятини давом эттираётган ўзбекистонлик боксчилар ҳақида ҳужжатли фильм шаклидаги материал тайёрлади. Бевосита воқеаларни кузатиб ўқиб борган талаба ватандошимиз Жалол Аҳмедов мазкур йирик мақолани бизга тўлиқ таржима кўринишида тақдим этди. Унда боксчиларимизнинг босиб ўтган йўллари, ҳали ҳеч қачон, ҳеч бир ўзбек матбуотига айтмаган гапларини ўқишингиз, АҚШнинг катта-катта промоутерлари нима сабабдан америкаликдан бошқа боксчиларни хушламаслиги ҳақида ҳам билиб олишингиз мумкин бўлади. Қуйида ушбу мақолани тўлиқ мутолаа қилишингиз мумкин. (Мақоланинг ўзбекча таржимаси тўлиқлигича муаллиф ва GoSport.uz интернет-нашри мулки ҳисобланади.)

Жанубий Калифорниянинг адирлардан иборат тоғларига улашиб кетган қумли саҳроларидаги етти қалъани бир гуруҳ чайир йигитлар забт этиш истагида тер тўкмоқда.

Ёшлигидан бошқаларга озор бермайдиган (қўй оғиздан чўп олмаган) руҳида тарбиялангани учун Марказий Осиёдан чиқадиган боксчилар шу вақтгача АҚШ профессионал рингларида иккинчи даражали кўринишларда намоён бўлиб келишган. Энди эса улар ҳаваскор боксда қўлга киритган муваффақиятларидан илҳомланган ҳолда энди бу натижаларни янада юксалтириш ниятида профессионал бокснинг бир неча вазн тоифаларида жаҳон чемпионлик камарлари сари шахдам қадамлар билан кириб келишмоқда ва бу орқали дунёнинг кенгроқ миқёсда забт этиш истагидалар.

“Биз дунёнинг исталган боксчиларига қараганда кўпроқ жонимизни бериб ишлаймиз. Биздаги каби жамоа бошқа ҳеч кимда йўқ. Тўғри, биз ҳақимизда кўпчилик ҳали яхши билмайди. Аммо биз профессионал боксда энг яхши жангларда иштирок этишни истайдиган жангчилармиз. Бошқаларга ўхшаб 15талаб мағлуб бўладиганларга қарши 20 талаб ўткинчи жанг ўтказиб, статистикаси орқали мухлислар қалбидан жой олмоқчи бўлаётганларга ўхшамаймиз”, дейди асли ўзбекистонлик 7та жангдан сўнг жаҳон чемпионлик камари учун жанг қилиш ҳуқуқини қўлга киритган Батир Ахмедов.

“Ҳозир бу кўзга ташланмаётган бўлиши мумкин, чунки биз ижтимоий тармоқлар ичида яшамаймиз, аммо кейинги бир неча ойлар ичида барчамиз ўзимиз учун муҳим жангларда ғалаба қозонганимиздан кейин одамлар бизни таний бошлашади. Биз АҚШга ҳордиқ чиқариш учун эмас, ўз устимизда тинимсиз ишлаб мақсадимиз, орзуларимиз рўёби учун келган ва бу борада дадил қадам ташлаётган инсонлармиз”.

34 ёшли Россиялик Вадим Корнилов ва унинг ёрдамчиси Алик Фролов бу йигитларнинг менежери сифатида Андрей Рябинский раҳбарлигидаги Россиянинг “Мир Бокса“ (World of Boxing) промотоутерлик компанияси билан шартнома имзолашларига муваффақ бўлишган.

Бу иқтидорларнинг профессионал боксда кўриниш беришига даставвал Вадим Корниловнинг 69 килограмм вазнда Рио олимпиадаси кумуш медали соҳиби Шаҳрам Ғиёсов (9-0, 7 КО) билан деярли тасодифан профессионал боксга ўтиш бўйича келишувга эришиши улкан туртки бўлган десак муболаға бўлмайди.

“Бизнинг Шаҳрам Ғиёсов билан бўлган келишувимиз ўз навбатида у орқали бошқа ўзбек боксчиларининг ҳам кашф этилишига сабаб бўлди. Мен 10 йилдан бери профессионал бокс соҳасидаги инсон сифатида шуни айтишим мумкинки, АҚШда профессионал бокс жуда ривожланган ва бу ердаги машғулот ва спаррингларда орттириладиган профессионал тажриба ва руҳий далда ватанидан, уйидан узоқда бўлган бу боксчилар учун жуда зарур”- дейди Корнилов.

Калифорниянинг Индио шаҳри бу йигитлар учун собиқ боксчилар ва ҳозирда мураббийлик фаолиятини олиб бораётган ака ука Жоэл ва Антонио Диаслар қўл остида машғулот олиб боришлари ва яшашлари учун идеал жой сифатида танланган.

Корнилов илк бора Диасни супер енгил (-63,5 кг) вазнда Руслан Проводников ва собиқ 2 вазнда жаҳон чемпиони Тимати Брэдлига қарши жанги учун мураббий сифатида ёллайди ва бу жанг 2013 йилда “Йил жанги” сифатида эътироф этилади. Кейинчалик Диас ўз “қаноти” остига олган савияли ҳаваскор боксчилар олдингиларидан кўра мутлақо ўзгача эди.

“Бу йигитлар мутлақо ўзгача ва камтар. Улар бизга (мексикаликларга) камтарлик нуқтаи назаридан ўхшаб кетади деб ҳисоблайман. Улар жаҳон чемпиони бўлиш учун ўз уйлари ва яқинларидан узоқда бўлишларига мажбур бўлмоқда, аммо шунга қарамасдан улар ҳеч қачон шикоят қилишмайди, бу ерни ўз уйларидек кўришади” дейди Диас.

Ғиёсовдан ташқари яна бир истеъдодли ўзбек боксчиларидан бири Муроджон Аҳмадалиев (7-0, 6 КО) ўзининг еттинчи жангидаёқ иккинчи ярим енгил (-55,34 кг) вазнда расмий даъвогар сифатида WBA ва IBF йўналиши чемпиони Даниэл Романга қарши жангини 13-сентябрь куни ўтказиши лозим эди. Аммо Даниэл Романнинг ўнг елкасидаги жароҳати туфайли жанг қолдирилди.

“Роман бу жанги истаётганига шубҳам бор, аммо улар бизга декабрда мазкур жанг ташкил қилиш муаммо бўлмаслигини айтишмоқда”,- дейди Корнилов.

Роман бош тортгач, ўша куни Аҳмадалиев рейтинг жангида Уилнер Сотога қарши жанг ўтказиб, 4-раундда рақиби устидан нокаут эвазига ғалаба қозонди.

Супер ярим ўрта (-69,85 кг) вазнда 4 та жанг ўтказиб (уларнинг барчаси 10 раундлик) ва барчасида нокаутли ғалабалар сериясини давом эттираётган Исроил “The Dream” Мадримов ҳам бокс жамоатчилиги назарига тушган. У сўнгги жангида 5-октябрь куни Нью-Йорк шаҳридаги “Мэдисон Сквер Гарден”да қозоғистонлик Геннадий Головкин ва украиналик Сергей Деревянченко ўртасидаги IBF ва IBO камарлари учун кечган жангнинг асосий тўқнашувларидан бирида мексикалик Алехандро Баррерани техник нокаут эвазига мағлубиятга учратди.

Жорий йилнинг иккинчи қисмида уларнинг сафи янада кенгайди. Ёшлигидан аждодларинг темирчи ҳунармандлик касби орқали меҳнатда қотган исми “Темир Одам” маъносини англатувчи Бектемир “Bully” Мелиқўзиев (2-0, 2КО) ва 2016 йил Рио олимпиадаси чемпиони ўзининг профессионал дебют жангидаёқ жаҳон чемпионлик камари учун рингга чиқиши кутилаётган яна бир истеъдод эгаси Ҳасанбой Дўстматов ҳам уларга келиб қўшилди.

“Бизга бу йигитларни олиб келишганида уларнинг қандай даражада эканликларини кўрдик. Мен Антониога: “Қадрдон, энди бизни елкамизда улкан тоғ пайдо бўлди“, дедим. Бу жуда катта масъулият эди ва биз уларнинг лозим бўлган даражага олиб чиқишимиз шарт эди. Жуда кўп ишлашимизга тўғри келди. Машғулотлардан уйга жуда ҳолдан тойган куйи қайтардик…”, дейди Диас.

Рябинский янги келиб қўшилган истеъдодлар эвазига яқин 2 йилда чемпионлик камарларига эгалик қилиш орқали ўз компаниясини жаҳон бренди даражасига олиб чиқишни кўзламоқда. Шу билан биргаликда, бу боксчилар билан уларнинг она ватани Ўзбекистонда ҳам бокс кечаларини ташкил этишни ваъда қилган.

“Бизнинг мақсадимиз боксчилар учун нимаики яхши бўлса бажариш ва улар сўраётган барча шароитларни яратиб бериш. Кўп ҳолларда жаҳон чемпионларини тарбиялаш учун миллионлаб маблағларни сарфлашга тўғри келишини яхши биламиз, аммо биз боксдан завқ оламиз ва умид қиламанки, ёш атлетларга ёрдам беришдек хайрли юмушдан ҳеч ҳам чарчамаймиз” дейди “Мир Бокса“ раҳбари Рябинский

Рябинский ва Корнилов олдинроқ бир неча россиялик боксчилар билан яхши натижаларга эришади. Руслан Проводников, Дмитрй Пирог, Денис Лебедев, Александр Поветкин ва украиналик Виктор Постоллар шулар жумласидан. Ҳозирда эса уларнинг катта умидларидан бири бўлган ярим оғир (-79,34 кг) вазнда WBA чемпиони Дмитрий Биволга ҳам АҚШлик бокс ишқибозлари ва экспертлар эътибори ошиб боришидан умидворлар.

Бивол (16-0, 11 КО) ёш ўзбек қаҳрамонларимиздан узоқроқ Лос-Анжелес шаҳрида машғулотлар ўтказсада, ўз жангларида кетма-кет кучли боксчиларга “дарс бераётганликлари” ва ўзлари учун АҚШ бокс маркетингида яхшигина гонарарли қизиқарли жанглар ўтказаётганликлари билан ўзаро узвий боғлиқликлари бор.

Хусусан, Бивол 2018 йил 24 ноябрь ойидаги HBO каналининг охирги трансляцияси орқали ташкил қилинган бокс оқшомида кўнгилли равишда иштирок этиб Жан Паскал устидан ғалабага эришади ва ўз ҳамёнини 1 миллион долларга бойитиб олади ва ушбу вазндаги таниқли чемпионлар Сергей Ковалёв, Олександр Гвоздик, Артур Бетербиевлар орасида ўз ўрнига эга эканлигини исботлаб берди.

Аммо, Бивол сўнгги учта жангида очколар ҳисобига кўра ғалаба қозонди ва бу ҳужумкор боксни, нокаутларни яхши кўрадиган аудиторияни эътиборини торта олмаслиги табиий.

“Нокаут йўқми? Сенинг жангларинг ҳақида ҳеч ким гапирмайди. Бокс билан алоқадор инсонлар жанг темпи паст ва нокаут эҳтимоли кам бўлган жангларга тоқатлари йўқлигини яшириб ўтирмайди. Таққослаш учун супер ярим енгил (-58,97 кг) вазн чемпиони Тевин Фармер ва ўрта вазн (-72,6 кг) чемпиони Деметриус Андраде, иккаласи ҳам америкалик чемпионлар аммо мен телевизорни ёқсам ва Тевин Фармер жанги бўлаётган бўлса, ўйлаб ўтирмай бошқа каналга ўзгартираман”, – деб фикрини давом эттиради Диас.

Корнилов эса боксчиларнинг қаердан келганликлари ва миллати билан боғлиқ маълумотларга ҳеч қандай эътибор бермаслигини яшириб ўтирмайди. “Агар улар қаршисига қўйилган рақибларини бирин-кетин мағлуб этаверишар экан, бокс оммаси эътиборини ҳам ўзига жалб этишаверади. Ҳар кимнинг ўз услуби ва потенциали бор”, – деб давом этади Корнилов. “Умид қиламизки улар барча камарларга эга чиқишади. Албатта, бу аниқ, деб айта олмаймиз, ахир бу бокс. Аммо жамоа билан бир ёқадан бош чиқариб ишлаш ва тинимсиз меҳнат орқали албатта катта натижани кўзлаш мумкин”.

Диас айниқса Аҳмадалиевнинг иккинчи ярим енгил вазн чемпиони Роман билан бўладиган жангидаги имкониятларини юқори баҳоламоқда. Ва бу жанг Муроднинг фаолиятидаги энг осонларидан бири бўлишига ишонмоқда.

Юлдуз боксчилар ҳам нега АҚШда йўқолиб қолишади?

Турли ҳил давлатлардан келувчи ва ўзга тилда гаплашувчи боксчилар учун Америка бокс оммаси кўнглига йўл топиш бироз мушкулроқ. Улар эътиборига тушиш ва ўз номини танитиш эса боксчилар учун ўзгача қийинчилик туғдиради.

“Агарда сен шу (инглиз) тилда гапирмас экансан, сен учун бошқаларда қизиқиш уйғотиш жуда қийин жараён”, – дейди бу муаммога бевосита дуч келган ва 3 вазнда жаҳон чемпиони украиналик Василий Ломаченко ва Олександр Гвоздикларнинг оммага танитган Top Rank раҳбари Боб Арум. “Қачонки қўл остингизда супер енгил вазн тоифасининг 2 йўналиш (WBC ва WBO) чемпиони Френсодан, асли мексикалик Хосе Рамирес ва ярим ўрта вазн тоифасининг WBО йўналиши чемпиони омаҳалик Теренc Кроуфорд каби боксчиларимиз бор экан, биз уларга ўз уйларида, мухлислари қаршисида бўлиш учун имконият ярата оламиз. Бу болалар эса (бизнинг қаҳрамонларимиз) қанчалик кучли бўлишига қарамасдан уларнинг Америкада ўз “уйлари“ йўқ. Фақат уларни қўллаб-қувватлайдиган аниқ бир ҳудуд жамоаси йўқ”, дея сўзини тугатган Арум. (Таҳририятдан: Фазлиддин Ғоибназаровнинг нега профи боксда омади юришмаётгани сабабини тушунгандирсиз. Сен минг иқтидорли бўлма промоутеринг сенга ишонмаслигини очиқчасига айтиб ўтирса, иқтидорингдан кўра, унга пул, аудитория муҳимроқ бўлса додингни кимга айтасан. Маълумот учун Арум Ғоибназаровнинг промоутери саналади.)

Яна бир промоутер, Баҳодир Жалолов жангларини ташкил қилиб берувчи Лоу Дибелла ҳам шу нарсани эътироф этиб, номдор ва машҳур боксчилар Нью Орлеан шаҳридан Режис Прогрес, Боб Арум қўл остидаги Кроуфорд, Даллас штатидан Эррол Спенc ва супероғир вазн чемпиони Алабама штатидан Деонтэй Уайлдерлар ҳам айни мана шу жабҳада Марказий Осиё ёки Шарқий Европадан келган боксчилардан доим устун кўрилишини таъкидлаб ўтган.

“Инглиз тили тилида гапира олмайдиган боксчилар билан алоқа ўрнатиш ва кўрсатмалар бериш ўз фикрингни ва нимани ҳис қилаётганингни етказиб, бериш қийин. Бундан ташқари исмини инглиз тилида талаффуз қилишда мухлислар ва ҳаттоки журналистлар қийинчиликларга дуч келувчи бу боксчилар билан ишлаш узоқ йўл босиб ўтишни талаб қилади. Бу жуда мураккаб йўл. Агар қўл остингдаги йигит жуда ҳам иқтидорли бўлсагина, унга бўлган талаб юқори бўлишидан умид қилсанг бўлади”-дейди Лоу Дибелла.

Боб Арум эса америкаликлар промоутерлар ўзларининг боксчилари учун эътиборли бўлишлари лозим деган фикрни илгари суради.

“Агар сен Top Rank каби катта промоутерлик компаниясига эга бўлсанг, бутун дунёдан талантларни қўл остингга жалб қилишинг керак. Хўш, мен фақат шарқий европалик ёки осиёликлар билан ишлаб фойда қила олишим мумкинми? Албатта йўқ”, дейди у.

Бу баҳсли тортишувда ака-ука Диасларнинг фикри эса аксинча. Улар боксчининг келиб чиқиши — марказий осиёлик бўладими ёки бошқа ҳудудданми — рингдаги жанг вақтида бу кам аҳамият касб этади деб ҳисоблашади. Исбот сифатида август ойида Мексикада бўлиб ўтган бокс оқшомида Шаҳрам Ғиёсов собиқ жаҳон чемпиони Дарлес Пересни бутунлай бегона жойларда 41 сонияда нокаутга туширганини эслашади.

Ўша вақтда мураббийлар мухлисларнинг унга бўлган муносабатини кузатади. Шаҳрам рингни тарк этиши билан мухлисларнинг унга бўлган илиқ муносабати ва эсдалик учун суратга тушиши, автограф сўрашларидан борган сари унга бўлган эътибор ҳам кучайиб бораётганини сезиш қийин эмас эди.

Кучли рақиб орқали WBА рейтингида Ғиёсовнинг позициясини яхшилашга умид қилган ва бу орқали ўта жиддий қарама-қаршилик кутиб таваккал қилган менежерлар Корнилов ва Алик Фролов 41 сониялик нокаутни табассум ва мамнуният билан кузатар эканлар, қаҳрамонларимизга бўлган ишончлари ҳам тобора ошиб бораётган эди.

“Биз икки мексикалик ака-ука мураббийлар тайёрлаётган, кучли боксчиларга бемалол қаршилик кўрсатишга тайёр бўлган жангчилардан иборат жамоанг бор экан, бу кўп нарсадан далолат беради” – дейди Диас.“Даҳшатли нокаутлар билан кетма- кет ва давомли ғалабалар, айни мухлислар кўришни хоҳлаган ҳолатлардир. Бу албатта омманинг шов-шувли ва ижобий фикрларига сабаб бўлади. Мен Мексикадаги бокс кечасида ҳали жанг бошланмасдан ринг олдидаги икки инсон сўзлашаётганларига эътибор бердим. Улар “Ғиёсов жуда ажойиб жангчи бугун биз унинг ижросида нокаут кўрсак“ деб фикр билдиришмоқда эди. Албатта мураббий сифатида шогирдинг ҳақида бундай фикр эшитиш жуда ёқимли экан.

“Ҳа айнан шу жойида уларга энг керак бўлган ягона нарса бу реклама”

Балки ҳозиргача Индиодаги бу жамоа жуда танилиб улгурмаган бўлиши мумкин. Аммо Диаснинг айтишича, Мелиқўзиев, Аҳмадалиев, Ғиёсов каби истеъдодларнинг Айниқса Муроджоннинг чемпионлик жангидан сўнг уларни яхши таний бошлашади. Шу билан биргаликда мураббий Исроил Мадримовни ҳозирнинг ўзида супер ярим ўрта вазнидаги WBО чемпиони, ҳозирда уни вакант қўйиб ўрта вазнга ўтишни кўзлаётган енгилмас Хайме Мунгияни ҳам мағлуб этишга тайёр, деб ҳисоблайди.

Улар ўзларини секин аста танитиб боришмоқда. Улар ярқ этиб кўзга ташланишганда, одамлар “жин урсин, бу болакайлар ким бўлди“, деб бир-бирларига савол бериб қолишади. Бу спорт турида ҳаммаси мана шундай содир бўлади. Ҳар бир боксчи машҳурликка эришиши учун бошқа бир машҳур номни мағлуб этиши шарт”, дейди мексикалик мураббий.

Ўзбек боксчилари ҳақида сиз билмаган ҳақиқатлар

2016 йилги Олимпиада бронза медали совриндори бўлган Аҳмадалиевнинг дарҳол бокс экспертлари эътиборини тортиши, промоутерлари томонидан табиий ҳолат сифатида кўрилмоқда.

Ўзбекистондаги оддий бир қишлоқда Мадримов сингари уч опа-сингилларидан кейин энг кичик фарзанд бўлган Аҳмадалиев 11 ёшида мактабдан сўнг ёзги таътилда каруселда хизмат кўрсатувчи сифатида ишлаган ва олган иш ҳақини бокс қўлқоплари ва пойабзалларини сотиб олиш учун ишлатган.

Кейинчалик у спорт мактабига қатнай бошлайди. Муроджон йиллар давомида ҳаваскор боксдаги нуфузли мусобақаларда 350 жанг ўтказиб бу баҳсларда тажриба тўплаб, тобланиб боради.

“Мен ҳаваскор боксда йиллар давомида қўлимдан келган барча марраларни забт этдим. Ҳозир мен бошқа чўққини кўзлаганман. Мақсадим шунчаки жаҳон чемпиони бўлиш эмас, балки бир неча йўналишларда, бир неча вазн тоифаларидаги чемпионлик камарларини бирлаштириш” – дейди Аҳмадалиев. “Роман билан бўладиган жангим шунчаки мен учун бошланиши. Янги чўққи учун ташланган илк қадам. Бу жангни тезроқ бўлишини ва одамлар менга ўзгача нигоҳ билан қарашларини жуда хоҳлаяпман”.

Қаҳрамонларимиз ичида ҳам очиқкўнгил, ҳам “безориси” супер ярим ўрта вазн тоифасида учинчи жангидаёқ бокс оламини ларзага келтириш арафасида турган Бектемир Мелиқўзиевдир. Мелиқўзиев сўнгги марта 30 август кунги иккинчи жангида ҳам худди биринчиси каби рақибини 1-раундда жигарига берилган кучли зарбаси орқали рингга қулатади. У атиги 23 ёш бўлишига қарамасдан шу вақтгача ҳаваскор боксда ўтказган 350 га яқин жангларидан 180 тасида рақибларини 3 раундга олиб бормай нокаутга учратган. Шу билан биргаликда Мелиқўзиев 2016 йилги Рио олимпиадаси бокс мусобақалари кумуш медаль соҳиби ҳамдир.

Мелиқўзиев ўзининг тарбия топиш жараёнлари ҳақида тушунтираркан “жуда қаттиққўл“ муҳитда ўсганини айтади. Унинг отаси ўқитувчи ва онаси шифокор бўлиб ишлашини айтаётганида, таржимонлик қилаётган Фролов бизга вазиятни тушунтиришга уринади: “Бу Ўзбекистондаги нисбатан камбағал оилалар ҳаёти. Икки мураккаб касб эгалари“, дея қўшимча қилади

Бектемирнинг отаси ўғлини таниқли спортчи бўлишини орзу қилар эди. Бектемир ёшлигида акалари ва бошқа ўзидан катта бўлган қўшни болалар билан муштлашишини кўриб унда ўзига хос иқтидор борлигини, спортнинг бокс тури у учун айни мослигини тушуниб етишади.

Қишлоқ жойларидаги шароит ва спорт заллари муаммо бўлгани учун, уни даставвал маҳаллий очиқ майдонларда машғулот ўтказувчи каратэ мураббийига шогирд қилиб беришади ва ўша ерда дастлабки машғулотларини олиб боради.

“Шунинг учун ҳам менинг зарба йўллаш техникам бошқачароқ. Мен 15 ёшимдаёқ бокс бойича Ўзбекистон чемпионлигини қўлга киритгандим ва шундан сўнггина мен мактабга қарашли залларнинг бирида тайёрлана бошладим”.

Оиласидаги ота боболаридан қолган темирчи ҳунармандлик таъсиридадир балки унинг билаклари табиий йирик ва бақувват. Шу билан биргаликда ёшлигиданоқ темирчилик ҳунари орқали меҳнат қилиб янада пишади.

“Бизнинг гавда тузилишимиз меҳнат орқали шундай. Менинг билакларим ҳам темирчи ҳунарманд наслимиздан келиб чиққан табиий шундай кўринишда”- дейди Мелиқўзиев. “Мени “Bully” деб аташлари фақатгина табиатдан “безори”лигим билан боғлиқ эмас, балки бульдогга ўхшаш кўринишим учун ҳам шундай дейишади. Мен бундай куч қаердан келишини билмайман. Аммо ҳар доим жанг қилган рақибимни ағдармай қўймайдиган, унга оғриқ бермасдан тўхтамайдиган “безори”ман. Рақибларим жонини оғритишни ёқтираман. Мен улар устидан шунчаки эмас, нокаут билан ғалаба қозонишни хоҳлайман. Мен рақибларимни оғриқ ҳис этишга мажбур қилганимда, нокаут қилганимда табассум қилишни хуш кўраман. Йўқ мен одамларнинг жони оғришидан қувонмайман, шунчаки бу менинг ишимнинг бир қисми эканлигидан. Агар рингда сизга рақиб бўлсам, мен у ерда сизга азоб бериш учун чиқаман. Бу менинг рингдаги вазифам”

Бу саҳро жангчилари промоутерлари ва шу вақтгача бўлган таассуротларидан шуни англашдики, АҚШда бокс ишқибозларини эътиборига тушиш ва ўзига жалб этиш учун Мелиқўзиевга ўхшаган “вайронкор” бўлиш талаб қилинади. Шу билан бир қаторда хушмуомала ва шу вақтгача босиб ўтган қийинчиликларини қўрқмай ошкора айта олиш хислатига ҳам эга бўлишлари керак.

Уларнинг ҳар бирида Индиога етиб келишларига қадар босиб ўтган ноёб йўллари бор. Улар турли шароит ва қийинчиликларда тарбия топишган бўлсада, бу саҳро бағрида ҳам жамоадош, ҳам ватандош сифатида ўзлари учун қулай шароитни яратиб бирга яшаб келишмоқда.

Улар иссиқ қумли саҳрода узоқ масофаларга югуриб, қатъий тартибдаги қийин юкламалар орқали мураббийлари билан машғулотлар олиб боришади, Улар бутун дунёга ким аслида тезроқ ўзларини намоён қила олишини исботлашга чоғланган. Аммо карьералари уларни қай манзилга етакламасин, улар асли ватанини, қаердан келганликларини ҳеч қачон унутишмайди.

Исроил Мадримов Ўзбекистоннинг ёзда Индио саҳросидаги каби жазирама иссиғи, баҳорда илиқ, қишда эса изғирин совуқ об-ҳавога эга бўлган қишлоқларидан бирида таваллуд топган.

Мадримов ҳаваскор боксда 330 та жанг ўтказган бўлиб, бу жангларда ўзининг кучли зарбасини ва етук техникасини шакллантириб боради. Унинг икки қўлида ҳам бирдек кучли зарбалари сабаб ҳозирда ўзининг энг ёқтирган боксчиси ва охирги жангларида ҳамкор сифатида ҳам ишлаган “янги Головкин” дея эътироф этилмоқда.

“У мен учун ёрқин юлдуз”, – дейди Мадримов қачонлардир унчалик танилмаган ва ҳозирда афсонага айланган қозоғистонлик Геннадий Головкин ҳақида. Уларнинг иккови ҳам охирги икки жангида АҚШда “Мэдисон Сквер Гарден”даги бир кечада рингга чиқиб, рақибларини мағлуб этишди. “Мен у каби машҳурликка эришиш учун Худоим тўғри йўл кўрсатишига ишонаман ва шу йўлдан боришга тайёрман. Мен боксда ва спортда биринчи рақамли бўлишни хоҳлайман. Бу ҳақиқий жентельменлар спорти”.

“Боксдаги тахаллусим “The Dream”— орзу, аммо бу машҳурликка эришиш ёки пул топиш орзуси эмас. Орзу бу оилам билан яхши шароитда бўлиш. Менинг чин орзуим оилам қувончини ва онамнинг юзидаги табассумни кўриш” – дейди Исроил. “Мен учун ҳаётимдаги энг муҳим нарса бу — онамнинг табассум қилиши. Онам табассум қилганида ўзимни жуда бахтиёр ҳис этаман. Мен 14 йилдан бери бокс билан шуғулланаман, аммо ҳамон мен орзуимдаги юқори даражага эришганим йўқ. Аммо қаерлик эканлигим ва менга ёрдам қўлини чўзаётганлар ишончини ҳис қилган ҳолда айтаманки, мен бу йўлда ҳеч қачон таслим бўлмайман.

“Ҳозир қилаётган ишимни тўхтатмайман. Биз шу йўлни танладик ва ортга қайтиш учун йўл йўқ”.

Жалол Аҳмедов тайёрлади.