Ўзбек боксчисидан нокаут бўлган рақиб жанжал кўтарди, баҳона топди ва барибир мағлубиятини тан олди!

Польшанинг Вроцлав шаҳридаги катта бокс кечасида ҳамюртимиз Лазизбек Муллажонов ўта оғир вазн тоифасида қозоғистонлик Нурсултон Аманжолов билан куч синашди.

Профессионал рингда рақиб боксчиси бунгача бешта жангнинг барчасида ғолиб чиққани ва тажрибаси кўпроқ эканини инобатга олиб, айнан Нурсултоннинг имкониятлари юқори баҳоланаётган эди.

Лазизбек Муллажонов эса, асосий эътиборини ҳаваскорлар боксига қаратгани боис, профессионал фаолиятини учта жанг бор эди, холос. Уларнинг барини боксчимиз муддатидан олдин якунлаган.

Прльшадаги олти раундлик рейтинг жанги мухлисларга кутилган кескин ва муросасиз беллашувни тақдим этмади. Ўзбек боксчиси биринчи раунд аввалидан шиддатли ҳужум бошлади. Нурсултон қақшатқич зарбалар сериясини ўтказиб юборганидан кейин учрашув ҳаками жангни тўхтатиб, техник нокаут қайд этди.

Профессионал фаолиятида илк бор “калтак” еган қозоқ боксчиси мағлубиятини тан олишни истамади. У техник нокаут эълон қилган ҳакам билан “Нега жангни тўхтатдинг”, деб тортишиб кетди, уни бир неча маротаба туртиб юборди, ўз бурчагига боришдан бош тортди.

Шу ўринда Boxingnewsonline.net сайти журналисти Деклан Уоррингтон Вроцлавдаги бокс кечасига оид қизиқ маълумотни тарқатди.

Мутахассис “Tarczyński Arena”даги ринг стандарт ўлчамларга тўғри келмаслигини таъкидлади.

- Вроцлав стадионидаги ринг кейинги пайтда мен кўрганлар орасида энг кичкинасидир, - деб ёзди Деклан Уоррингтон.

Жангдан кейин ҳиссиётларини босиб олган Нурсултон Аманжолов барибир мағлубиятини тан олди.

Қозоғистонлик боксчи мағлубият сабабини машғулотлар жараёни етарли даражада бўлмагани билан изоҳлади.

- Мағлубиятимнинг сабаблари кўп. Асосийси сабаби – мен мураббийсиз тайёрланган эдим, - деди Нурсултон Аманжолов.

Шундай қилиб, Лазизбек Муллажоновнинг профессионал боксдаги рекордни тўртта жанг, тўртта ғалаба ва тўртта нокаутга етди. Бундан ташқари, Лазизбек ҳаваскорлар боксида 46 та ғалаба ва саккизта мағлубият қайд этган. Муллажонов ҳаваскор бокс бўйича Осиё чемпионати ғолиби, жаҳон чемпионати совриндори ҳамда ҳарбий хизматчилар ўртасида жаҳон чемпиони ҳисобланади.

Профессионал боксдаги бешда жангдан иборат мағлубиятсиз сериясини якунлаган Нурсултон Аманжоловнинг ҳаваскор боксчилар ўртасидаги кўрсаткичлари бироз камтарроқ. Боксга ихтисослашган https://boxrec.com сайтида Нурсултон ҳаваскорлар ўртасида 13 та жангда ғолиб чиққани ва яна шунча баҳсни рақибларига бой бергани қайд этилган.