Ўзбек ҳужумчи ва украиналиклар ҳимоя қўрғони!

Рустат статистика-таҳлил агентлиги футбол бўйича Қирғизистон чемпионати юқори дивизиони –  Жогорку Лигасининг дастлабки турлари рамзий жамоасини эълон қилди.

Бу жамоадан ўрин олган футболчиларнинг ярмидан кўпи легионерлардир.

Рамзий жамоага тўрт нафар украиналик ҳимоячи киритилди: “Дордой”дан Дмитрий Семенив, “Мурас Юнайтед”дан Юрий Мате, “Илбирс”дан Назар Виздрик ва “Бишкек Сити”дан Никита Петерман.

Шунингдек, “Мурас Юнайтед” қанот ҳужумчиси Олег Марчук ҳам рамзий жамоадан ўрин олди.

Легионерлар орасида “Бишкек Сити”нинг ўзбекистонлик ҳужумчиси Руслан Розиев ҳам энг яхши футболчилар қаторига киритилди, у “Дордой” дарвозасига муҳим гол урган эди.

Қирғизистонлик футболчилардан “Бишкек Сити” дарвозабони Артём Прядкин, “Барс”дан Магомед Узденов ва Қайрат Жирғалбек уулу, “Мурас Юнайтед”дан Эрбол Атабаев ҳамда “Токтогул”дан Нурлан Сарикбаев рамзий жамоага киритилди.

Қизиқ жиҳати шундаки, “Азия” жамоаси ғалаба қозонганига қарамай, унинг ҳеч бир ўйинчиси рамзий жамоага киритилмаган. Шунингдек, тўрт турдан кейин жадвалда етакчилик қилаётган “Олға” ва “Узген” жамоаларидан ҳам ҳеч ким йўқ.

2026 йилги Жогорку Лига регламентига кўра, жамоа аризасида 10 нафаргача хорижлик ўйинчи бўлиши мумкин. Евросиё иқтисодий иттифоқига кирган давлатлари — Арманистон, Беларусь, Қозоғистон ва Россия футболчилари бу чемпионатда легионер ҳисобланмайди. Бир вақтнинг ўзида майдонда камида тўрт нафар Қирғизистон фуқароси бўлиши шарт.

Transfermarkt портали маълумотларга кўра, ушбу мавсумда Қирғизистон чемпионатида энг кўп легионерлар Украинадан келган ва уларнинг сони 37 нафарни ташкил қилмоқда.

Бу кўрсаткич бўйича иккинчи ўринда 28 нафар футболчи билан Ўзбекистон қайд этилган. Улар орасида ўтган йили Беларусь чемпионатида тўпурарлик маҳоратини намойиш қилган 23 ёшли Руслан Розиев энг машҳур ўйинчи ҳисобланади.