Ўзбекистонда қишки трансфер ойнаси қачон очилиши маълум бўлди

ЎзПФЛ 2021 йилги мавсум учун трансфер ойналари саналарига ойдинлик киритди ҳамда маълумот ФИФА сўровига кўра, бош ташкилотга юборилди. Бу ҳақда ташкилот расмий сайти хабар бермоқда.

Пандемия сабаб 2020 йилги мавсум якунланиши декабрь ойининг учинчи ўн кунлигига қадар чўзилиши катта эҳтимол. Шундан келиб чиқиб, қишки трансфер ойнаси аввалги икки мавсумда бўлгани каби 17 декабрь куни эмас, балки 4 январь санасида очилади. Халқаро майдонда Ўзбекистон шарафини ҳимоя қиладиган клублар ўз футболчиларини бунга қадар ҳам рўйхатдан ўтказиб олишлари мумкин бўлади.

4 январь куни очиладиган трансфер ойнаси 12 март санасига қадар давом этади. 12 март куни соат 23:59 га қадар шартномалар рўйхатдан ўтказилади. Ёзги трансфер ойнаси эса, 5 июлдан старт олиб, 31 июлга қадар давом этади. 

2021 йилги мавсум старти ҳақида кейинроқ ахборот берилади. Бунда ЎзПФЛ катта эҳтимол билан февраль ойи охирида бўлиб ўтиши мумкин бўлган U-19 Осиё чемпионати беллашувларини инобатга олади.