Ўзбекистонга қарши ўйнаган футболчи ўлим таҳдиди туфайли уйига қайтмади

Колумбия терма жамоаси ярим ҳимоячиси Хаминтон Кампас 2026 йилги жаҳон чемпионатидан кейин ўз ватанига қайтмаган.

Бу ҳақда журналист Камило Пинто ижтимоий тармоқда хабар берди.

Маълумотларга кўра, Колумбиянинг Швейцарияга қарши 1/8 финал баҳсида (0:0, пенальтилар сериясида 3:4) Кампас учрашувнинг 115-дақиқасида қулай вазиятдан фойдалана олмади. У тепган тўп дарвоза устидан ўтиб кетди. Кейин эса колумбияликлар пенальтилар сериясида мағлуб бўлиб, мусобақани тарк этган.

Шундан сўнг Кампас ва унинг оила аъзоларига ўлим таҳдидлари кела бошлаган. Футболчи бу таҳдидларни жиддий қабул қилган ва хавфсизлик нуқтаи назаридан Колумбияга қайтмасликка қарор қилган.

Хаминтон Кампас гуруҳ босқичида Ўзбекистон билан бўлган учрашувда ҳам иштирок этган эди.