ЎзПФЛ раҳбарияти "Андижон" клубининг янги қурилаётган қароргоҳи билан танишди

17 cентябрm куни Лига мутахассислари Андижон вилоятининг Булоқбоши туманида бўлиб, "Андижон" клуби учун барпо этилаётган замонавий қароргоҳнинг қурилиш ишлари билан танишди. 

Ўз тузилмасини босқичма-босқич ривожлантириб келаётган "Андижон" клубининг ҳозирга қадар қароргоҳи мавжуд эмасди. Бунинг оқибатида асосий таркиб билан ишлаш масаласида қатор муаммолар юзага келган. Шу йилнинг май ойида клуб таъсисчилари ҳамда «Ўзавтосаноат» АЖ раҳбарияти ўртасида учрашув бўлиб ўтди. Унда клуб учун замонавий қароргоҳ қуриш масаласи кўриб чиқилди. Шу асосда Булоқбошида жойлашган сўлим жой танлаб олинди. Шаҳар марказидан тахминан 20 дақиқалик йўлда жойлашган маскан ўз ҳавоси, сокинлиги, сув ҳавзасига яқин жойлашгани ва бошқа имкониятлари сабаб асосий таркиб ҳамда U21 жамоасининг тайёргарлиги учун қатор қулайликлар тақдим эта олади. 

Июль ойида қурилиши старт олган қароргоҳ бир вақтнинг ўзида 80 кишини ўз бағрига сиғдира олади. У ўзида замонавий ётоқхона, ошхона, тренажёр заллари, бассейн, тиббиёт пункти, йиғилишлар зали, шунингдек, 2 та стандарт ўлчамдаги табиий футбол майдонларини мужассам этади. Қурилиш ишлари 2025 йилнинг март ойида якунланиши режалаштирилган. 

Футбол майдонларидан бирида асосий таркиб ўз машғулотларини ўтказади. Иккинчи майдонда эса U21 жамоаси иштирокидаги ўйинларни ҳам ўтказиш кўзда тутилган. Мазкур майдон четида мухлислар футбол томоша қилиши учун трибуна қад ростлайди.

Маълумот учун, 2020 йилнинг иккинчи ярмида "Андижон" клуби таъсисчилари ўзгарди. Шундан кейинги 1,5 йил ичида клуб эски қарздорликларни босқичма-босқич тўлади. 2022 йилнинг 16 ноябрь куни Лига мутахассислари Андижон вилояти ҳокимлиги билан учрашиб, "Бобур арена" футбол майдони ҳамда прожекторларини талаб этилган даражага етказиш масаласида келишувга эришди. 

Хусусий секторнинг жалб этилиши, кейинчалик «Ўзавтосаноат» АЖ ёрдами билан клуб қайта оёққа тура бошлади. Бугунга келиб "Андижон" клубида ҳеч қандай қарздорлик мавжуд эмас. Мухлислар билан ишлаш, уларга шароит яратиш ва бошқа масалаларда "Андижон" Суперлиганинг энг олди клубларидан бирига айлана олди. Шунингдек, ўз тарихида илк бор Ўзбекистон Кубогининг финалига йўлланма олди. 2025 йилга келиб клуб ўзининг замонавий қароргоҳига эга бўлиши бу борада қўйилаётган навбатдаги муваффақиятли қадам ҳисобланади.

ЎзПФЛ матбуот хизмати.