Паралимпия. Пара дзюдочиларимиз жаҳон чемпионатига тайёргарликни фаол олиб боришмоқда

Янгиланган таркиб билан нуфузли мусобақаларга тайёргарлик кўраётган пара дзюдо бўйича Ўзбекистон терма жамоаси аъзолари айни дамда Миллий паралимпия қўмитаси спорт базасида навбатдаги ўқув-машғулот йиғинини олиб бормоқда.

“Ҳозирда олдимизда жуда ҳам масъулиятли мусобақа кутиб турибди. 6-10 ноябрь кунлари Озарбайжон пойтахти Боку шаҳрида бўлиб ўтадиган Жаҳон чемпионатида муносиб иштирок этишни мақсад қилганмиз. Ушбу дунё биринчилигига тайёргарликнинг дастлабки босқичини тоғ ён бағрларида жойлашган “Ширинбулоқ” спорт базасида олиб бордик. Мана энди тайёргарликнинг 2- ва 3-босқичлари пойтахтимиздаги Миллий паралимпия қўмитаси спорт базасида ўтказилмоқда. Ушбу ўқув-машғулот йиғинида жами 39 нафар спортчи ва 11 нафар тренер иштирок этмоқда. Машғулотлар кунига 2 маҳалдан олиб борилмоқда. Ўз навбатида яратиб берилган бундай шароитлар учун муҳтарам Президентимизга ва қўмита раҳбариятига ўз миннадорчилигимни билдираман”, - деди Ўзбекистон Миллий паралимпия қўмитаси Оммавий ва техник спорт турлари клуби рахбари Фарҳод Тўраев.