"Paxtakor" bugun chempionlikka erishsa, kubok topshiriladimi? - Diyor Imomxo‘jaev javob berdi

Bugun Superliga 18-turdan qoldirilgan "Bunyodkor" — "Paxtakor" uchrashuvi bo‘lib o‘tadi. Bellashuv 17:00da boshlanadi.

Agar "sherlar" zafar quchsa, muddatidan avval chempionlikni rasmiylashtiradi. Ammo bugun Shota Arveladze shogirdlariga kubok topshirilmaydi. Bu haqda PFL bosh direktori vazifasini bajaruvchi Diyor Imomxo‘jaev telegramdagi sahifasida xabar berdi.

- Bugun 17:00 da Toshkent derbisi bor: "Bunyodkor" — "Paxtakor".

Chempionlar ligasi sabab, yo‘qotilgan turlarini bugun "Paxtakor" qolganlar bilan tenglashtirib oladi. Va bugun Shota Arveladze jamoasi zafar quchsa, muddatidan oldin chempionlikni rasmiylashtiradi.

Kelishuvga ko‘ra, "Paxtakor"ga kubok topshirish marosimi katta ehtimol bilan FIFA kunlaridan keyingi 23-turda bo‘lib o‘tadi. 20 noyabr kuni "Paxtakor" mazkur tur doirasida "Qo‘qon-1912" klubini qabul qiladi. Agar "Paxtakor" kerakli ochkolarni shu ikki o‘yinda jamg‘ara olmasa, kubok topshirish marosimi, tabiiyki surilib boraveradi, - dedi Diyor Imomxo‘jaev.