"Пахтакор" бугун чемпионликка эришса, кубок топшириладими? - Диёр Имомхўжаев жавоб берди

Бугун Суперлига 18-турдан қолдирилган "Бунёдкор" — "Пахтакор" учрашуви бўлиб ўтади. Беллашув 17:00да бошланади.

Агар "шерлар" зафар қучса, муддатидан аввал чемпионликни расмийлаштиради. Аммо бугун Шота Арвеладзе шогирдларига кубок топширилмайди. Бу ҳақда ПФЛ бош директори вазифасини бажарувчи Диёр Имомхўжаев телеграмдаги саҳифасида хабар берди.

- Бугун 17:00 да Тошкент дербиси бор: "Бунёдкор" — "Пахтакор".

Чемпионлар лигаси сабаб, йўқотилган турларини бугун "Пахтакор" қолганлар билан тенглаштириб олади. Ва бугун Шота Арвеладзе жамоаси зафар қучса, муддатидан олдин чемпионликни расмийлаштиради.

Келишувга кўра, "Пахтакор"га кубок топшириш маросими катта эҳтимол билан ФИФА кунларидан кейинги 23-турда бўлиб ўтади. 20 ноябрь куни "Пахтакор" мазкур тур доирасида "Қўқон-1912" клубини қабул қилади. Агар "Пахтакор" керакли очколарни шу икки ўйинда жамғара олмаса, кубок топшириш маросими, табиийки сурилиб бораверади, - деди Диёр Имомхўжаев.