Плей-оффга чиққан "Пахтакор" қанча ишлаб олди?

"Пахтакор" Элит ОЧЛнинг плей-офф босқичига йўл олди. "Ал-Аҳли" "Ал-Гарафа"ни йирик ҳисобда таслим қилди. Ундан олдин эса "Персеполис" "Ан-Наср" билан дуранг ўйнади. 

Шу тариқа, Қатар клуби 7 очко билан 9-ўринда қолиб кетди. Эронликлар бўлса 7 очко тўплаган ҳолда 8-поғонада турибди. "Пахтакор"да голлар нисбати яхшироқ бўлгани учун 7-ўринга кўтарилиб олган. 

"Пахтакор» Элит чемпионлар лигасида қанча даромад топди? Ушбу масала ҳақида Алишер Никимбаев ўз телеграм каналида маълум қилди.

"Гуруҳ босқичидаги ғалаба ҳар бир клубга 100 000 доллар олиб келади, дуранг учун эса бонуслар мўлжалланмаган. Шунинг учун "Пахтакор" кеча ўзининг илк 100 000 доллар мукофот пулларини қўлга киритди. Бунга қўшимча равишда, ҳар бир клуб гуруҳ босқичида қатнашгани учун 800 000 доллар олади.  

Бироқ, "Ас-Садд" устидан қозонилган ғалаба "Пахтакор"ни 1/8 финалга олиб чиққанлиги учун, клуб қўшимча равишда яна 200 000 доллар ишлаб топди. Шу ўринда, келгуси босқичларда алоҳида ғалабалар учун мукофот йўқлигини таъкидлаш лозим. Чорак финалга чиқиш 400 000 доллар, ярим финалга чиқиш эса 600 000 доллар қўшимча даромад олиб келади. 

Финалда иштирок этган жамоа 4 миллион долларга кафолатли эга бўлади, ғолиб эса 10 миллион доллар мукофот олади. 

Келгуси Клублар ўртасидаги Жаҳон Кубогида иштирок этиш имконияти ҳам бор, бу эса камида 50 миллион доллар даромад келтириши мумкин.  

Шундай қилиб, "Пахтакор" жорий Осиё Чемпионлар Лигасида ҳозирча 1 100 000 доллар ишлаб топди:  

- 800 000 - гуруҳ босқичида иштирок учун  
- 100 000 - "Ас-Садд" устидан қозонилган ғалаба учун  
- 200 000 - 1/8 финалга чиққани учун.