Почеттино нега "Тоттенхэм" таклифини рад этганини тушунтирди

АҚШ терма жамоаси бош мураббийи Маурисио Почеттино баҳор ойларида Лондоннинг «Тоттенхэм» клубига қайтиш имкони юзага келгани, аммо бу вариант амалга ошмай қолгани ҳақида гапириб ўтди.

Аргентиналик мутахассиснинг таъкидлашича, «шпорлар» унга расман мурожаат қилган, бироқ у АҚШ терма жамоаси билан олдиндан режалаштирилган жаҳон чемпионатига тайёргарлик туфайли таклифни қабул қила олмаган.

«Агар ўша пайтда мен эркин бўлганимда эдим, албатта, таклифни қабул қилган бўлардим. Балки бир куни юлдузлар мос тушар, мен яна клубга қайтарман. «Тоттенхэм»ни ҳатто Чемпионшипда ҳам бошқаришга розиман. Бу – мен ҳар доим ёрдам беришга тайёр бўлган ягона клуб. Бошқа жамоага бормасдим, фақат «Тоттенхэм»га», — дея Почеттино сўзларини келтиради talkSPORT.

Эслатиб ўтамиз, Почеттино 2014 йилдан 2019 йилгача «шпорлар»ни бошқарган. Унинг қўл остида жамоа Англия вице-чемпиони бўлган ва Европа Чемпионлар лигаси финалигача етиб борган.