Почеттинонинг қарори баҳсга сабаб бўлди: Футболчилар хабарни почта орқали олди

Жаҳон чемпионатида иштирок этиш учун АҚШ терма жамоасига жалб этилган футболчилар бу хабарни WhatsApp гуруҳи орқали Почеттинонинг видео мурожаатини қабул қилди. Кейинчалик уларга электрон хат ҳам юборилди. Терма жамоага киритилмаган футболчилар эса фақат электрон почта орқали хабардор қилинди.

Почеттинонинг айтишича, видео мурожаатнинг мақсади футболчиларни руҳлантириш эмас, балки таркиб ҳақида расман маълумот бериш бўлган.

- Бу уларни илҳомлантириш учун эмасди. Бу таркибни маълум қилиш учун қилинган эди, - деди мураббий Нью-Йоркдаги таркиб тақдимоти маросимида.

Терма жамоага чақирилмаган футболчилар ҳақида гапирар экан, Почеттино расмий мусобақа бўлгани учун мулоқот услуби ўзгармаслигини таъкидлади.

Унинг сўзларига кўра, у таркибдан четда қолган футболчиларнинг ҳис-туйғуларини яхши тушунади, аммо бу пайтда улар ундан гап эшитишни истамайди.

АҚШ терма жамоасининг собиқ футболчиси ва ESPN шарҳловчиси Херкулес Гомес эса футболчиларни таркибга кирмагани ҳақида электрон хат орқали хабардор қилиш қарорини қаттиқ танқид қилди.

- Агар бу рост бўлса, жуда шафқатсиз қарор, - деди Гомес.

Почеттинонинг таркиби Нью-Йорк шаҳридаги Pier 17 мажмуасида жаҳон чемпионатининг расмий транслятори бўлган Fox Sports томонидан тақдим этилди.

Маросим мусобақанинг норасмий очилиши сифатида баҳоланди. Бироқ ҳафта охирида таркибнинг тўлиқ рўйхати интернетда тарқалиб кетгани тадбир таъсирини бироз пасайтирди.

Таркибга киритилган футболчиларнинг ярми 2022 йилги жаҳон чемпионатида ҳам иштирок этган. Улардан саккиз нафари ҳозирда Major League Soccerда тўп сурмоқда. Жамоадаги барча дарвозабонлар ҳам MLS вакиллари ҳисобланади. Шунингдек, 15 нафар футболчи фаолиятининг маълум қисмини ички чемпионатда ўтказган.

Почеттино таркибни шакллантириш бўйича қарорларини ҳам ҳимоя қилди. Унинг айтишича, якуний қарорлар таркиб эълон қилиниши арафасида қабул қилинган.

Расмий рўйхатлар ФИФАга 1 июнь кунига қадар топширилиши керак. Бироқ жамоалар биринчи ўйиндан бир кун олдингача жароҳатлар сабаб ўзгартиш киритиш ҳуқуқига эга.

Журналистлар терма жамоага чақирилмаган Тэннер Тессман ҳақида сўраганида, Почеттино бу мавзуни муҳокама қилишни истамади.

- Таркибга кирган футболчиларга нисбатан ҳурматсизлик бўлади, - деди мураббий.

Аргентиналик мутахассис ўзи ҳам бир вақтлар жаҳон чемпионати таркибидан четда қолганини эслади.

- Шунинг учун бу қанчалик оғриқли эканини яхши биламан. Бу қарорни қабул қилиш мен учун ҳам жуда оғир бўлди. Аммо бу  менинг вазифам, - деди Почеттино.

Терма жамоа сардори Тим Рим эса журналистларга таркибга кимлар киритилгани унчалик аҳамиятли эмаслигини айтди.

- Ҳамма жамоадан нималар кутилаётганини яхши билади, - деди у.

Гуруҳ босқичида АҚШ 12 июнь куни Парагвайга қарши Лос-Анжелесда, 19 июнь куни Австарлияга қарши Сиэтлда ва 25 июнь куни Туркия билан яна Лос-Анжелесда майдонга тушади.

Бу йил ФИФА чемпионатни кенгайтириб, иштирокчилар сонини 48 тага, ўйинлар сонини эса 104 тага етказди. Шунингдек, илк бор 1/16 финал босқичи ҳам жорий этилди.