ПСЖ: Бу ҳужумчи учун зўр таклиф, лекин сал кам!

Муваффақиятсиз мавсумдан кейин Италиянинг “Милан” клуби келаси чемпионат олдидан таркибини жиддий тарзда кучайтиришга ҳаракат қиляпти. Миланликлар Европа Чемпионлар лигаси ғолиби “Пари Сен-Жермен”га ҳужумчи Гонсалу Рамушни сотиб олиш бўйича расмий таклиф билан чиқди.

Бонуслар ҳисобга олинганда таклиф қиймати 45 миллион еврога етиши кўрсатилган бўлса-да, Париж клуби португалиялик форвард савдосидан 50 миллион евро ишлаб олишни режалаштирмоқда. Бу ҳақда A Bola хабар берди.

Манба маълумотига кўра, 25 ёшли футболчи трансфери бўйича томонлар ўртасидаги 5 миллион евролик фарқ битим амалга ошишига жиддий тўсқинлик қилмайди.

“Милан” ҳужумчи учунт курашда Мадриднинг “Атлетико” клуби билан рақобат кучайиб бораётгани сабабли Рамуш трансферини тезроқ якунлашни истамоқда.

Ўтган мавсумда Рамуш барча мусобақаларда 45 та ўйинда иштирок этиб, 12 та гол урди ва 2 та голли узатмани амалга оширди.

Унинг ПСЖ билан амалдаги шартномаси 2028 йил ёзигача мўлжалланган. Transfermarkt портали футболчининг бозор қийматини 30 миллион евро деб баҳоламоқда.