ПСЖда ички зиддият кучайиб кетди. Бу трансферларга таъсир қилади

“Пари Сен-Жермен” спорт директори Луиш Кампуш ва бош мураббий Луис Энрике ўртасидаги зиддият кучайиб бормоқда.

Вазиятни кузатиб бораётган таниқли журналист Лоик Танзининг маълум қилишича, Луис Энрике жамоа билан ишлашда авторитар ва ёпиқ усулни қўлламоқда. Бу спорт директори Луиш Кампушнинг жамоага таъсир доирасини чеклаб қўйди.

Оқибатда клубда кадрлар масаласига масъул бўлган Луиш Кампуш испаниялик мураббийнинг хатти-ҳаракатларига эътироз билдирмоқда.

Клуб хўжайини Нассер Ал-Хелаифий ҳозирча ички зиддиятга муносабат билдиргани йўқ ва ҳар икки томонга ҳам ён босмоқчи эмас. У мутахассислар ўзаро келишиб олишини кутиб турибди.

Экспертларнинг таъкидлашича, бош мураббий ва спорт директорининг зиддияти клубнинг трансфер сиёсатига салбий таъсир қилиши мумкин.