ПСЖнинг зарбаси “Барса”ни курашдан чиқарди

“Барселона” раҳбарияти Рональд Куман Каталонияга келганидан бери кутаётган футболчи – Жоржиньо Вейналдум учун курашдан чиқди.  

“Ливерпуль” билан янги битим имзолашдан бош тортган нидерландиялик ярим ҳимоячи Каталонияга келиши кутилганди. “Барселона” мутасаддилари Вейдалдум билан шахсий шартнома бўйича келишувга эришган.

Бироқ,  ПСЖ  чемпион футболчига “Барса”дан икки баравар кўп маош таклиф қилди ва Жоржиньо Парижга кўчиб келадиган бўлди. Каталонияликлар эса, ўз таклифини ўзгартирмаслигини билдирмоқда.

30 ёшли футболчи ПСЖ билан 2024 йилнинг ярмигача давом этадиган шартномани имзолаши қолди холос.

Жоржиньо Вейналдум “Ливерпуль”да беш йил тўп тепиб, жами 237 та учрашув ўтказди, 22 та гол ва 16 та голли пас муаллифи бўлди. Ливерпулликлар билан Англия чемпионати, Чемпионлар лигаси, УЕФА Суперкубоги ва клублар ўртасидаги жаҳон чемпионатида бош совринга эга бўлди.