Пул тайёр! Гвардиола январда “Реал”нинг қимматбаҳо юлдузини кутяпти

Англия Премьер-лигаси чемпионлиги учун курашаётган “Манчестер Сити” раҳбарияти Хосеп Гвардиолага “Реал”дан машҳур футболчини олиб бериш учун катта харажатга тайёр.

Transfer News Live ва Fichajes каби манбаларнинг маълум қилишича, “шаҳарликлар” қишки трансферлар ойнаси очилганидан кейин “Қироллик клуби”га Родриго Гоэс учун 80 миллион евро таклиф қилмоқчи.

Охирги мавсумда бразилиялик ҳужумкор футболчининг Мадриддан кетиши ҳақида жуда кўп бор турли маълумотлар тарқатилмоқда. Жамоага Килиан Мбаппе ва Жуд Беллингем келганидан кейин Родриго иккинчи планга ўтиб қолган.

Янги бош мураббий Хаби Алонсо ҳам Родригога қараганда, унинг рақобатчиларига кўпроқ суяняпти.

“Манчестер Сити” эса, анчадан бери Родригога кўз тикиб келади. 24 ёшли футболчининг ўзи жаҳон чемпионатидан олдин мунтазам ўйин амалиётига эга бўлиш мақсадида муҳитни ўзгартиришга қарши эмаслиги айтиляпти.