Пулсиз мотивация бера олмадик, шартномам уч йиллик эди - "Бухоро"нинг собиқ устози яна қандай ҳақиқатларни айтди?

Яқинда бухоролик мураббий Жамшид Саидовни “Локомотив” клубида иш бошлагани ҳақида сайтимиз орқали хабар бергандик.

Хабарингиз бор, мутахассис ўтган мавсумнинг ярмидан “Бухоро” клубига бош мураббийлик қилганди. Аммо жамоа Суперлигани тарк этди. Кейин эса Саидовнинг ўрнига Даврон Файзиев олиб келинди. Бироқ шундан кейин тушунмовчиликлар келиб чиқди.

Яъни, ўтган йили “Бухоро”ни бошқарган Жамшид Саидов расман лавозимидан озод этилмагани маълум бўлди. Устига-устак, унинг амалда клуб билан шартномаси ҳам мавжуд бўлган. Фақатгина яқинда ушбу масала узил-кесил ҳал этилди ва Саидов “Бухоро”дан расман кетди.

Эндиликда у “Локомотив” болалар ва ўсмирлар спорт мактаби директори сифатида фаолият олиб боряпти. Куни кеча ушбу мутахассис sports.uz учун собиқ клубидаги юз берган вазиятлар ва “Локомотив”да иш бошлаши ҳақида гапирди.

- Биласиз, 2020 йилда “Андижон”да эдим. Пандемия сабабли, чемпионат тўхтаб қолди, - дея гап бошлади мураббий. - “Бухоро”да раҳбарият алмашгач, клубдан менга таклиф бўлди. У ерда дастлаб техник директор лавозимида иш бошладим. Бир ой ишладим. Кейин раҳматли вилоят ҳокими Карим Жамолович Камолов мени чақириб, бош мураббийликка таклиф қилди. Бунгача ҳам “Бухоро”да уч марта ишлаб кетгандим, ўзим ҳам бухороликман. Ўшанда вилоят ҳокими билан гаплашганимда жамоа кучсиз эканини, бундай вазиятдан чиқиб кетиш қийин бўлишини айтгандим. Бунинг устига пандемия туфайли жамоада молиявий муаммолар ҳам бор эди. Биз ҳаммасини гаплашиб олгач, “Бухоро” билан уч йилга шартнома туздим. Кейинчалик раҳбарлар алмашди. Жамоанинг ўйини ҳам омадсиз чиқди, 6-7 ой пул олмадик. Шунда ҳам охиригача курашдик. Лекин футболчиларга етарлича мотивация бера олмадик, пул сабабли. Бу ҳам етмаганидек, биз ўз майдонимизда бирорта ўйинни ўтказмадик, ҳамма учрашувда сафарда ўйнадик.

Мураббийлар штабим яхши эди. Александр  Хомяков, Аугустин Чирица, Николай Минчев, Алексей Рошчин...Бизга омад ҳам кулиб боқмади. Албатта, ачинарли, ҳаёт шунақа экан, жамоа про-лигага тушиб кетди. Декабрь ойида раҳбарлар ўзгаргач, янги бош мураббийни олиб келишди. Шунга қарамасдан, мени “Бухоро” билан яна икки йиллик шартномам бор эди. Кейин янги раҳбарлар билан гаплашдик ва якунда бир тўхтамга келиб, шартномани бекор қилдик. Биласизми, марҳум вилоят ҳокими билан иш бошлаш олдидан гаплашганимда натижа учун кафолат бермагандим. Чунки пулсиз қийин эди. Фақат истиқболли режалар асосида ишламоқчи эдик. Биз иқтидорли йигитлар орқали таркибни шакллантириб, яна Суперлигага қайтариш ниятимиз йўқ эмасди. Мураббийларнинг ҳаёти шунақа – натижа бўлмаса кетасиз. Раҳбарларга албатта натижа керак. “Бухоро”нинг Суперлигадан тушиб кетгани ачинарли, айниқса, мен учун ҳам оғир зарба эди. Қийинчиликларга қарамасдан, кўп ҳаракат қилгандик.

Қаранг, бу йилги мавсумда илк турданоқ мураббийлар алмашяпти, ўзгаришлар катта бўляпти. Мураббийларга ишлаш осон эмас. Агар менга Суперлигадан яна таклиф бўлса, албатта кўриб чиқаман.

Бу йил “Бухоро”да тажрилаби ўйинчилар йиғилган. Про-лигада рақобат кучли. Кузатиб турибмиз. “Нефтчи”, “Динамо”, “Олимпик”, “Бухоро”...мана шу тўртта жамоа асосий мақсад учун охиригача курашади деб ўйлайман. Про-лига бу йил жуда қизиқарли. “Бухоро”нинг ўтган йилги таркиби деярли 99 фоизга ўзгариб кетди. Биз ўшанда асосан ёшлар билан ўйнагандик. Лекин билардимки, ўша таркибдаги ҳамма ёшлар ҳам Суперлигага тортиши қийин эди.

Энди "Локомотив"га ўтганим ҳақида тўхталсам, олдин ҳам бу жамоада ишлаб кетганман. Катта мураббий ва директор лавозимларида меҳнат қилганман. 2019 йилда “Андижон”дан таклиф бўлгач, у ерга кетгандим. “Локомотив”нинг болалар ва ўсмирлар спорт мактабида бир ярим ишлаганман. Шу боис, клуб раҳбарлари ҳам мени билишарди. Натижада яна бир бор “Локомотив”га таклиф қилишди.

“Локомотив”да ёшларга эътибор катта. Мураббийлар билан маслаҳатлашиб иш қиляпмиз. Шанба ва якшанба кунлари шаҳар чемпионатини кузатиб турибмиз. Бу орқали селекция ишларини давом эттиряпмиз. Ёшларга эътибор юқори. Улар “Локомотив”нинг пойдевори. Маълум вақт ўтгач, иқтидорли ёшлар босқичма-босқич асосий таркибга чиқиб борадилар. Португалиялик мутахассиснинг машғулотларини кузатдим, аммо ҳали ўзи билан гаплашганим йўқ. Ҳозир унга ҳам осон эмас, тўртта ўйинда ғалаба бўлгани йўқ. Мураббий сифатида уни тушунаман. Унга вақт керак, у жамоа учун бор кучини беряпти, ўз ишини билади. Менимча, “Локомотив”га омад етишмаяпти, - дейди Саидов.