Қизил карточкаси бекор бўлган "Андижон" футболчиси ҳакамлик, Қаршидаги дуранг ва Самарқандда кутаётган ўйин ҳақида

Хабарингиз бор, ўтган турда "Андижон" жамоаси футболчиси Илҳом Абдуғаниев сафарда “Қизилқум”га қарши учрашувда ҳакамнинг нотўғри қарори туфайли қизил карточка кўрсатилиши натижасида майдондан четлатилганди. Лекин ЎФА тартиб-интизом қўмитаси вазиятни одилона баҳолаб, ушбу четлатилишни бекор қилди ва Абдуғаниевга кейинги баҳсларда ҳам майдонга тушишга рухсат берилди. Барчаси ижобий ҳал бўлгач, футболчи “Андижон” матбуот хизматига интервью берди.

- Илҳомжон, сизни "Қизилқум" билан учрашувда олган қизил карточкангиз ЎФА тартиб-интизом қўмитаси томонидан қайта кўриб чиқилди ва бекор қилинди. Аввало, ўша вазият хусусида тўхталиб ўтсангиз.

- “Қизилқум”га қарши ўйиндаги қизил карточка масаласида барчаси кўриб чиқилиб, бекор бўлганидан хурсандман. Тўғриси, ўша вазиятда рақиб ўйинчисига оёғим тегмаганди. Ўшанда бош ҳакамга ВАР ёрдамида кўринг деб айтдим, у кўриб чиқяпмиз деди. Лекин қарорини ўзгартирмади. Балки оёғимни баландроқ кўтарганим бош ҳакамни бошқача қарор чиқаришига сабаб бўлган бўлиши мумкин. Лекин мени ҳаракатларим тўпга эди, рақибга эмас. Бу вазиятни ВАР орқали такроран кўриб чиқишса балки қарори ўзгарган бўларди.

- Қизил карточкангиз бекор қилиниши ҳақида ўйлаганмидингиз?

- Ўйиндан кейин ушбу вазиятлар кўриб чиқилиши айтилганидан кейин тўғриси, шундай қарор бўлишини кутгандим.

- Қаршидаги учрашувда "Андижон" иродасини кўрсатди. Рости, майдондан четлатилганингиздан кейин қандай натижани кутгандингиз?

- Қаршидаги ўйин биз учун омадсизлик билан бошланди. Аввалига гол ўтказиб юбордик. Кейин мен сабабли жамоам бир футболчи кам бўлиб қолди. Дарвозамизга пенальти белгиланди. Худога шукурки, йигитлар катта меҳнат ва иштиёқ эвазига бу ўйинда характер кўрсатиб, очко олишга эришди. Бундай ўйинлар учун жамоам билан фахрланаман. Танаффус пайтида ҳаммаси далда бўлиб, мени қўллаб-қувватлашгани учун жамоамининг барча аъзоларига раҳмат.

- Олдинда жамоани Самарқандда "Динамо"га қарши учрашув кутмоқда. Бу баҳсга тайёргарлик қандай ва нима кутяпсиз?

- Олдинда Самарқандда яна бир ажойиб ўйин кутиб турибди. “Динамо”га қарши учрашувга тайёргарлигимиз яхши кетяпти. Машғулотларда мураббийларнинг кўрсатмалари асосида шуғулланяпмиз. Менимча, “Динамо” жорий мавсумда ўз майдонидаги илк ўйинини ўтказади. Бу ҳам ўзига яраша қизиқ бўлади. Худо хоҳласа, чиройли ўйин ва чиройли ғалаба билан Андижонга қайтамиз.

-  Ҳозирда жамоани кайфияти қандай?

- Жамоа кайфияти аъло даражада. “Қизилқум” билан учрашувдан кейин футболчиларнинг ўзига бўлган ишонч янада ошди. Худо хоҳласа, “Динамо”га қарши ўйиндан кейин ҳам зўр кайфиятда мухлисларимиз  билан бирга ғалабани нишонлаш насиб қилсин.