"Қизилқум" "Металлург"ни мағлуб этган учрашув фотогалереяси

Coca Cola Суперлигасида 11-тур баҳслари якунланди. Мавсумни омадсиз тарзда бошлаб, ёзги трансфер ойнаси вақтида кўплаб номдор футболчилар билан ўз сафини кучайтирган "Қизилқум" жамоаси "Металлург"га қарши баҳс олиб борди.

"Пахтакор" стадионида кечган учрашувда навоийликлар 2:1 ҳисобида рақибдан устун келишди. 7-дақиқада Ойбек Қиличев амалга оширган жарима тўпидан сўнг тўп "жонли девор"га тегиб, ўз йўналишини ўзгартирди ва Александр Лобанов қўриқлаётган дарвозадан ўрин олди.

15-дақиқада Игнатий Нестеров бошлаб берган ҳужумни Алишер Саноев муваффақиятли якунлади — 2:0. Беллашувга ҳакам томонидан қўшиб берилган тўртинчи дақиқада эса Ихтиёр Тошпўлатов ҳисобни қисқартиришга эришди.

Шу тариқа, "олтин изловчилар" ҳисобидаги очколар сони 8 тага етди ва ўзаро ўйиндаги мағлубият сабаб, "Сурхон"дан сўнг, турнир жадвалида 12-ўринни эгаллаб турибди. Қаторасига икки ўйинда мағлуб бўлган "Металлург" эса 16 очко билан жадвалнинг 7-поғонасидан жой олган.