"Қўқон-1912"га қайтган дарвозабон қандай фикрда?

“Қўқон-1912” жамоасига қайтган дарвозабон Ислом Абдуллаев клуб матбуот хизматига ўз фикрлари билан ўртоқлашди.

Авваламбор Ассалому алайкум, ҳаммага кириб келаётган янги йил муборак бўлсин. Ўтган йилги мавсумда «Қўқон-1912» жамоасининг ўйинларини имконим борича тўлиқ кўришга ҳаракат қилдим. Менимча, жамоага озгина омад етишмади.

Легионерлик фаолияти ҳақида...

Бир йил давомида легионер бўлиб ўйнаш насиб этди, бунга Яратгандан миннатдорман. Борган жамоамга қўлимдан келганича ёрдам беришга ҳаракат қилдим. Менимча, мураббийлар ишончини оқладик, деб ўйлайман.

Нега айнан «Қўқон-1912» жамоаси...

«Қўқон-1912» жамоасига қайтишимдан аввал Қирғиз Республикасидан ҳам таклифлар бўлди, бироқ «Қўқон-1912» жамоасидан яна таклиф тушганидан сўнг иккиланмасдан жамоага қайтишга қарор қилим. Жамоага қайтишимга клуб раҳбари ва мураббийлари катта ўрин тутишди. Улар менга ишонч билдиришганидан хурсандман. Худо хоҳласа, уларни ишончларини оқлайман, деган умиддаман. «Қўқон-1912» жамоасига қайтишимдан асосий мақсад клубнинг келажагига ишончим бўлди. Шу сабабли ҳам жамоа билан уч йиллик шартнома имзоладим. Худо хоҳласа, келаси йил Про лига ғолиби бўлиб Суперлигага қайтамиз.

Мухлислар ҳақида...

Уларни биринчи навбатда янги йил билан табриклаб қоламан. Мухлисларни қаттиқ ҳурмат қиламан. Мен клубга илк бор 2012 йилда келган бўлсам, улар доим максимал даражада бизни қўллаб туришган. Баъзи одамлар энг зўр мухлислик Наманган ёки Андижонда дейишлари мумкин, бироқ бизнинг мухлислар дунёдаги энг зўри. Худо хоҳласа, биргаликда келаси йил Суперлига йўлланмасини қўлга киритамиз.

“Қўқон-1912” матбуот хизмати.