Рамос "Реал"га қайтиши мумкин

Мексиканинг "Монтеррей" клуби 39 ёшли марказий ҳимоячиси Серхио Рамос Мадриднинг "Реал" клубига қайтиши мумкин. Бу ҳақда Испаниянинг Defensa Central нашри хабар бермоқда.

Манбага кўра, испаниялик футболчининг "қаймоқранглилар" сафига қайтиши қишки трансферлар давридаёқ кўриб чиқилмоқда. Рамоснинг Мексика клуби билан шартномаси якунланмоқда ва бир ойдан сўнг у расман эркин агент мақомига эга бўлади. Бу ҳолат унинг трансфер учун товон пулисиз ўтишини таъминлайди. Шу билан бирга, мадридликлар тажрибали марказий ҳимоячига эҳтиёж сезмоқда, бу эса ҳимоя чизиғини кучайтириш учун Рамос номзодини долзарб қилади. Аввалроқ, жароҳатлар туфайли ҳимоя марказида "Реал"нинг ҳимоячилар билан боғлиқ муаммолари ҳақида хабар берилганди.

Серхио Рамос "Реал" сафида 2005-2021 йиллар оралиғида 16 мавсум тўп сурган. Бу вақт ичида у барча мусобақаларда мадридликлар либосида 671 та ўйин ўтказди. Ҳимоячи 101 та гол урди ва 40 та голли узатмани амалга оширди, у клуб тарихидаги энг кўп гол урган ҳимоячилардан бирига айланди. "Реал"даги фаолияти давомида Рамос кўплаб совринлар, жумладан, тўртта УEФА Чемпионлар Лигаси ва бешта Испания чемпионлигини қўлга киритди.

Футболчи жорий йилнинг февраль ойидан буён Мексиканинг "Монтеррей" жамоасида тўп суриб келмоқда. Ушбу клуб сафида 39 ёшли футболчи 30 та учрашувда қатнашиб, 7 та гол урган.