Раньери Гасперини билан жанжаллашди ва клубдан кетади

“Рома” бошқарув кенгаши маслаҳатчиси Клаудио Раньери яқин вақт ичида ўз лавозимини тарк этади.  Бу ҳақда инсайдер Фабрицио Романо ижтимоий тармоқларда хабар қилди.

Аввалроқ хабар берилганидек, бу қарорнинг сабаби римликлар бош мураббийи Жан Пьеро Гасперини билан муносабатлардаги кескинлик бўлган.

Томонлар трансфер сиёсати борасида бир фикрга кела олмаган: мураббий жамоа таркибидан норози бўлган, Раньери эса барча келишувлар биргаликда тасдиқланганини таъкидлаган.

Мавсум сўнгги қисмида жамоа натижаларининг барқарор эмаслиги фонида бу келишмовчиликлар янада кучайган.

Италия А Сериясининг 33 туридан кейин “Рома” 58 очко билан 6-ўринда бормоқда. Гасперини жамоа билан 2025 йил ёзидан бери ишлаяпти.

73 ёшли Раньери 2024 йил ноябрида “Рома”ни бошқарган ва ўтган мавсум якунигача муваффақиятли ишлаган. Римлик мураббий бунгача ҳам икки марта – 2009-2011 йиллар ва 2019 йил март-июнь ойларида “Рома” бош мураббийи бўлган.