Рақиб мураббийи футболчининг учта тиши уриб синдирганидан кейин ўйин тўхтатиб қўйилди

Нидерландия чемпионатининг учинчи дивизионидаги навбатдаги тур учрашуви майдонда эмас, трубина ичкарисига кирадиган йўлакда содир бўлган жанжал туфайли охирига етмай қолди. 

Бюнсхотен шаҳрида ўтказилган “Эйсселмервогелс” – ГВВВ учрашуви тайм орасида тўхтатиб қўйилди. Сабаб – майдон эгалари ҳимоячиси Кьермо Дюмайга қилинган ҳужум. De Gelderlander нашри ёзишича, футболчи юзига зарба олган, натижада унинг учта тиши орқага силжиб кетган.

Ўйин Нидерландия чемпионатининг учинчи кучли дивизиони бешинчи туридан ўрин олган бўлиб, Утрехт провинциясидаги минтақавий дерби мақомига эга эди. Биринчи бўлим ГВВВ жамоаси фойдасига 0:2 ҳисобида якунланган, ҳодиса эса футболчилар кийиниш хонаси томон йўл олган пайтда ҳудудида содир бўлган.

Маълумотларга кўра, зарбадан сўнг Дюмайнинг учта тиши шикастланган ва ўрнидан силжиб кетган. Шу воқеадан кейин “Эйсселмервогелс” футболчилари майдонга қайтишдан бош тортган ва ўйин давом эттирилмаган.

RTV Utrecht хабарига кўра, кескинлик биринчи бўлим давомидаёқ сезила бошлаган, аммо можаро сабаби ҳали аниқ эмас. “Эйсселмервогелс” бош мураббийи Виллем Леушуйснинг айтишича, Дюмай унга ҳужум қилган шахс сифатида ГВВВ бош мураббийи ёрдамчиси Йон ван Бекерингни кўрсатган.

Шу билан бирга, Венендал шаҳри клуби ўз расмий сайтида воқеани кескин қоралаб, барча ҳолатлар тўлиқ ўрганилгандан сўнг интизомий чоралар кўрилишини маълум қилган.

Жабрланувчи футболчи шифохонага мурожаат қилган ва полицияга ариза ёзган. “Эйсселмервогелс” клуби мурожаатидан сўнг ҳуқуқни муҳофаза қилиш органлари стадионга етиб келган.

Полиция ходимлари ва клуб вакилларига трибуналардаги вазиятни ҳам назорат қилишга тўғри келган – икки жамоа мухлислари ўртасида тортишув ва тартибсизликлар кузатилган. Шу билан бирга, ҳеч ким қўлга олинмагани маълум қилинган.

Маълумот учун, 25 ёшли ҳимоячи Кьермо Дюмай 2026 йил ёзида ГВВВ клубидан “Эйсселмервогелс” сафига ўтган. У 2022 йилдан бери ГВВВ таркибида ўйнаб келаётган эди. Якунланмай қолган учрашув эса унинг собиқ жамоасига қарши илк ўйини бўлиши керак эди.