Rasman! Islom Toʻxtaxoʻjaev "Andijon"ga oʻtdi

“Andijon” jamoasi tarkibni kuchaytirish uchun olib borayotgan seleksiya doirasida bu safar yana bir tajribali futbolchi - Islom Toʻxtaxoʻjaev bilan kelishuvga erishildi. Bu xususida klub matbuot xizmati xabar bermoqda.

1989 yilning 30 oktbyar sanasida Fargʻonada tavallud topgan markaziy himoyachi oʻzbek futbolida oʻz oʻrniga ega boʻlgan ijrochilardan biri sanaladi.

2023 yilning yarmidan buyon OKMK sharafini munosib himoya qilib kelgan Toʻxtaxoʻjaev 2026 yildan eʼtiboran “Andijon” safida toʻp suradi.

Islom “Neftchi”, “Lokomotiv”, “Lyaoning” (Xitoy), “Qizilqum”, “Al-Garafa” (Qatar) singari klublarda oʻynagan.

Shu kungacha Toʻxtaxoʻjaev faoliyati mobaynida 427 ta oʻyinda maydonga tushib, 32 ta gol urdi va 10 ta golli assistni amalga oshirgan. Oʻzbekiston milliy terma jamoamiz tarkibida 78 ta oʻyinda qatnashgan va 2 ta gol muallifi boʻlgan.  

Jamoamizning yangi aʼzosi uch karra Oʻzbekiston chempioni va ikki karra Kubok sohibi hisoblanadi.