Расман! Супертрансфер амалга ошди

Англия Премьер-лигасининг амалдаги чемпиони “Ливерпуль” клуби футбол тарихидаги энг катта трансферлардан бирини амалга оширганини расман эълон қилди.

Шу пайтга қадар “Байер”да ўйнаб келган 22 ёшли Флориан Вирц тиббий кўрикдан муваффақиятли ўтди ва ливерпулликлар билан расмий шартнома имзолади.

 Transfermarkt портали “Ливерпуль” Вирцни қўлга киритиш учун леверкузенликлар ҳисоб рақамига 125 миллион евро ўтказиб берганини қайд этди. Бу сумма немис футболчисининг трансферини жаҳон футболи тарихидаги энг қиммат харидлардан бирига айлантирди.

- Мени янги саргузаштлар кутаётганидан ҳаёжондаман. Бундеслигадан чиқиб, Англия Премьер-лигасига қўшилиш мен учун янгилик. Бу лигада қай даражада ўйнай олишимни вақт кўрсатади. Қўлимдан келганларининг барини ишга солишга ҳаракат қиламан.

Мен бу мамлакатда ўйнаган бир неча футболчилар билан гаплашдим. Улар АПЛ менга идеал даражада мос эканини таъкидлашди. “Ливерпуль”даги биринчи учрашувимни интизорлик билан кутяпман, - деди Флориан Вирц.

Ўтган мавсумда Вирц Леверкузен жамоаси сафида 45 та учрашувда қатнашиб, рақиблар дарвозасини 16 маротаба ишғол қилди ва жамоадошларига 15 та голли пас узатди.