Ravshan Ermatov: 2021 yilda O‘zbekistonda turli sport turlari bo‘yicha 25 ta xalqaro musobaqalar o‘tkaziladi

5-7 mart sanalarida Toshkent shahrida dzyudo bo‘yicha "Katta dubulg‘a" turniri bo‘lib o‘tishi rejalashtirilgan. Bugun ushbu nufuzli musobaqa oldidan bo‘lib o‘tgan matbuot anjumanida O‘zbekiston jismoniy tarbiya va sport vazirining birinchi o‘rinbosari Ravshan Ermatov ishtirok etdi va quyidagi fikrlarni bildirib o‘tdi:

"So‘nggi yillarda mamlakatimizda Osiyo va jahon chempionatlari, Gran-Pri turnirlari hamda Olimpiya o‘yinlariga yo‘llanma beruvchi litsenzion musobaqalar yuqori saviyada tashkil etib kelinmoqda. Shuni ta’kidlashim joiz, Osiyo Olimpiya Kengashi tomonidan O‘zbekistonga yuksak ishonch bildirilib, ilk marotaba 2025 yilgi yoshlar o‘rtasida IV yozgi Osiyo o‘yinlari ishonib topshirildi. Dunyoda epidemiologik vaziyat barqaror bo‘lib tursa, rejaga muvofiq, 2021 yilda O‘zbekistonda turli sport turlari bo‘yicha 25ta xalqaro musobaqalar o‘tkaziladi.

Jumladan, joriy yil 5-7 mart kunlari Toshkentdagi «Humo Arena» muz saroyida o‘tkaziladigan «Katta dubulg‘a» turnirida O‘zbekiston terma jamoasi to‘liq tarkib bilan ishtirok etib, Olimpiya o‘yinlari sari muhim qadam tashlashiga ishonaman. Shubha yo‘qki, Toshkent «Katta dubulg‘a» xalqaro turniri ham kuchli raqobat va murosasiz kurashlar ostida o‘tadi. Ushbu musobaqaga tashrif buyuradigan xorijiy davlatlar vakillari esa Toshkentdan unutilmas ijobiy xotiralar bilan qaytadi", - dedi Ravshan Sayfiddinovich o‘z nutqida.