Равшан Эрматов "Андижон" футболчиларининг калтаклангани ҳақидаги хабарларга ўз муносабатини билдирди

Ўзбекистон Республикаси Жисмоний тарбия ва спорт вазирининг биринчи ўринбосари ва Ўзбекистон футбол ассоциацияси вице-президенти Равшан Эрматов айрим интернет манбаларида “Андижон” клуби футболчиларининг “Сурхон”га қарши ўйиндан сўнг калтаклангани ҳақидаги хабарларга ўз муносабатини билдириб ўтди.

“Йўқ, агар бу рост бўлганида, мен буни эшитган бўлардим. Бу ҳақиқатга тўғри келмайди. Бизда учрашув комиссари, ўйинни ўтказиш учун футбол ассоциациясидан масъуллар юборилади. Улар барчасини кўрган бўларди, улар бундай воқеаларни ўтказиб юборишлари мумкин эмас. Агар қандайдир ҳодиса юз берса, бу ўйин протоколида ёзилган бўларди. Ҳисоботларда эса ҳеч нарса йўқ”, - деди Эрматов Спутник нашрига берган интервьюсида.

Эслатиб ўтамиз, “Сурхон”га (1:0) имконият бой берилгач, жамоа бошлиғи Дониёр Муллажонов бош мураббий Бахтиёр Ҳамидуллаевни истеъфога чиқарган эди.