Равшан Ҳайдаров: Бош мураббийликни расман топширмадим, фақат терма жамоада ишлар кўпайгани учун клубни Андреев бошқариб турибди

Муваффақиятсизлик гирдобига тушиб қолган “Сурхон” клубида вазият ижобий томонга ўзгарармикин? Агар бу кетишда бўлса, термизликлар Суперлигада қолиш масаласини ҳал қила олмасликлари ҳам эҳтимолдан ҳоли эмас. Жамоада эса руҳий тушкунлик борлиги аён.

Устига-устак бош мураббий Равшан Ҳайдаров ҳам жамоа билан бирга эмас. Яқинда ҳам Равшан Акмалович бетоблиги сабабли даволанаётгани ҳақида маълум қилгандик. Шундан кейин мутахассис яна “Сурхон”га қайтганди. Бироқ орадан кўп ўтмасдан Ҳайдаров клубда кўринмай қолди.

Ўтган турда “Пахтакор”га қарши учрашувда ёрдамчи мураббий Владимир Андреев жамоани тайёрлади. Аммо якуний ҳисоб “Сурхон” учун аянчли бўлганини билсангиз керак. Ўз дарвозасидан жавобсиз олтита тўп олиб чиқишди. Хўш, Ҳайдаров “Сурхон”да ишлашда давом этадими ёки бор эътиборини Ўзбекистон U-22 терма жамоасига қаратадими? Вазиятга аниқлик киритиш учун мураббий Sports.uz сайтига интервью берди.  

-  Ўтган турда “Сурхон”нинг “Пахтакор”га қарши ўйинида сизни кўрмадик, ёрдамчи мураббий Владимир Андреев жамоани бошқарди. Айни пайтда клубда вазият қандай? Сизнинг клубда эмаслигингиз нима билан боғлиқ ёки режаларингиз ўзгардими?

-  Ҳа, “Пахтакор” билан учрашувга баъзи сабабларга кўра бора олмадим. Умуман айтганда, охирги пайтларда жамоа билан етарли даражада бирга бўла олмадим. Бунинг сабаби бор эди. Аввалига бетоб бўлиб қолдим, кейин эса U-22 терма жамоасининг йиғинлари бўлиб ўтди. “Сурхон” жамоасини эса ўйинларга Андреев бошчилигидаги мураббийлар штаби тайёрлаяпти. Ўтган вақт давомида кўпроқ маслаҳатчи сифатида иш олиб бордим, десам ҳам бўлади. Бундай пайтда эса жамоани Владимир Андреев бошқариб тургани ҳам мантиқан тўғри бўларди. Ҳозирги пайтда терма жамоадаги ишлар янада кўпайган, менда масъулият олдингисидан ҳам кўпроқ юклатилган. Терма жамоада ташкилий масалалар бўйича қиладиган ишларимиз бор. Ноябрь ойи бошларида яна ушбу терма жамоамиз йиғин ўтказади. Шу сабабли “Сурхон”ни Андреев бошқариб туради, деган тўхтамга келдик.

-  Бундан чиқди, сиз мавсум охирига қадар “Сурхон” билан бирга бўла олмас экансиз-да?!

-  Маслаҳатчи мақомида бўламан. Шундоқ ҳам клубнинг кўп машғулотларида қатнаша олмаяпман. Бу эса ўзимга ҳам ноқулай бўляпти.

-  “Сурхон” таркибида тажрибали футболчилар бўлишига қарамай, жамоавий ўйиннинг йўқлиги ачинарли. Клубга нима бўляпти?

-  Пандемия сабабли тайёргарлик жараёнлари ва руҳий ҳолатини бир меъёрига келтира олмаётганлигимиз ҳам балки таъсир кўрсатаётгандир. Балки футболчилар билан доим бирга бўла олмаётганимиз боис жамоани тўлиқ ҳис қила олмаётгандирмиз. Бунинг устига омадсизликлар ҳам кўп. Тайёргарлигига ҳам кўп нарса боғлиқ. Тўғриси, бир нима дейиш қийин. Лекин йигитлар ҳаракат қилишяпти.

-  Суперлигада қолиш учун “Андижон” ва “Бухоро”нинг қаторига “Сурхон” ҳам қўшилиб қолди. Имкониятларни қандай баҳолайсиз?

-  Имкониятлар бор. Битта ғалаба бўлса, футболчиларнинг руҳиятини ҳам, кайфиятини ҳам ўзгартириб юбориши мумкин. Умид қилиб, ҳаракат қилиб ўйнаш керак ва охиригача курашиш лозим.

-  Мағлубиятлар барибир жамоанинг ички руҳиятига ва муҳитига таъсир қилмасдан қолмайди. Охирги пайтларда клубда муҳит қандай эди? Жамоани бузаётган футболчилар йўқмиди?

-  Бу ерда тажрибали ўйинчилар тўпланган. Улар профессионал. Нима қилиш кераклигини билишади. Ҳар бир учрашув ҳар томонлама олдинга қадам қўйиш учун имконият. Айниқса, очко ва турнир жадвалидаги вазият нуқтаи назаридан ҳар бир ўйин муҳим. Буни футболчилар яхши тушунишади. Айтяпман-ку, охирги пайтларда жамоанинг машғулотларида қатнаша олмадим. Шунинг учун ҳозир бир нима дейиш қийин. Чунки футболчиларнинг руҳиятини ҳис қилиш учун клуб билан доим бирга бўлиш даркор. Лекин бошидан йигитлар машғулотларда ва ўйинларда иштиёқ билан ҳаракат қилишаётганди. Тўғри, баъзи-бир камчиликлар ғалаба қозонишимизга тўсқинлик қилаётганди. Омадсиз ўйинларимиз жуда кўп. Ютаётиб якунда ютқазиб қўйган учрашувларимиз ҳам бўлди. Балки бу ҳам футболчиларнинг руҳиятига таъсир қилган бўлиши мумкин. Жамоанинг омадсизлиги кўп омилларга боғлиқ.

-  Бош мураббийликни расман Владимир Андреевга топширдингиз, десак ҳам бўладими?

-  Расман топширмаганман. Терма жамоада ишлар кўпайгани учун вазият шундай бўлиб қолди. Андреев билан ҳам гаплашиб турибман. Фақат ўйинларга Андреев билан Абдухўжаев тайёрлашяпти.

-  Ўзбекистон U-22 терма жамоасидаги режаларингиз ҳамда вазифаларингиз қандай?

-  Пандемия бўлиб қолган пайтда ҳам терма жамоани икки марта йиғдик. У ерда жуда яхши, иқтидорли футболчилар йиғиляпти. Ўзим учун ҳам янги-янги ўйинчиларни кашф қиляпман. Жамоавий ўйинни йўлга қўйишга ҳаракат қиляпмиз. Ҳозир жамоавий ўйин шаклланиш жараёнида. Қизиқарли жамоа тузиляпти ва рақобат ҳам кучайиб боряпти. Ҳар бир йиғинда янги футболчиларни кўряпмиз. 1999 ва 2000 йилларда туғилган иқтидорли йигитларга имконият беряпмиз. Шу йил жамоа шаклланиши жараёнида. Вақт эса жуда тиғиз. Чемпионат эса тугаб боряпти. Қишда улар спорт формасидан чиқиб қолишади. Ундан кўра, ҳозир барча номзодларни кўриб олиш керак. Чунки айни пайтда футболчилар ўйнашяпти ва доим ўйин амалиётига эгалар. Шу боис тез-тез йиғинлар ташкил қилиб уларни синовдан ўтказиб оляпмиз. Бундай пайтда вақтни йўқотмаслигимиз муҳим. Мураббийлар штаби билан ишга жиддий ёндашяпмиз. Терма жамоамизнинг вазифасига келсак, келаси йилнинг июнь ойида Осиё чемпионатига саралаш баҳслари ўтказилиши режалаштирилган. 2022 йили эса Осиё чемпионатининг финал босқичи бўлиб ўтади. Биз аввало саралаш баҳсларига футболчиларни тайёрлаб боришимиз керак.

-  Икки йил олдин Ўзбекистон U-23 терма жамоаси билан Осиё чемпионлигини қўлга киритиб футболимиз тарихида янги саҳифа очгандингиз. Бу йил эса яна ушбу ёшдаги футболчилардан иборат янги жамоа тузилди ва унга сизни бош мураббий қилиб қўйишгани бежиз эмас. Бунинг замирида балки яна Осиё чемпионлигини қайтаришдек муҳим вазифа тургандек тасаввур уйғоняпти...

-  Сизга U-22 терма жамоасининг моҳиятини тушунтириб берсам, бу ёшдаги футболчилар учун энг муҳими халқаро мусобақа ва халқаро тажриба тўплаш. Асосий мақсад эса шу терма жамоа билан миллий терма жамоа ўртасида узилиш бўлиб қолмаслигидир. U-23 мусобақаси эса айнан шу мақсадда ўйлаб топилган. Масалан, U-18, U-19 ёшлилар ўртасидаги жаҳон чемпионатига чиқа олмадик. Осиё чемпионатининг финал босқичида ҳам қатнашишмади. Айтмоқчиманки, муҳим мусобақаларни ўтказиб юбордик. Бунинг оқибатида бундай халқаро турнирларда иштирок эта олмаган ўйинчилар йўқолиб кетиши мумкин. Натижада миллий термага муносиб номзод бўлиб етиб бора олишмайди. Мана, ўша 2018 йилги чемпион бўлган таркибимизга қаранг, ҳозир улардан қанчаси миллий терма жамоада ўйнаяпти-а? Тўғри, кейинчалик Олимпиадага чиқа олмадик. Аммо асосий мақсад барибир миллий терма жамоага ўйинчиларни етказиб бериш эди. Улардан кейинги авлод эса 1999 ва 2000 йилларда туғилган футболчилар. Тўғри, агар шу таркиб билан ҳам муваффақиятларга эришсак, нур устига аъло нур бўлади. Асосий мақсад эса миллий терма жамоага кўприк сифатида олиб боришдир. U-23 чемпионати шунинг учун ташкил қилинади. Натижада миллий термада ҳам рақобат оширилади. Албатта, бундай мусобақада бизнинг рейтингимиз ҳам, ҳурматимиз ҳам баланд. Табиийки, Осиё чемпионатига йигитларни руҳлантириб, ғалабалар сари етаклаб борамиз.

-  Клубдан кўра, терма жамоаларда бир мунча яхшироқ ишлай олишингизга гувоҳ бўлиб келяпмиз. Ўзингиз учун ҳам клубга нисбатан термада ишлаш қулайроқми?

-  Профессионал мураббийман. Албатта, клуб билан терма жамоада ишлаш принциплари бошқача. Ёшлар билан ишлашнинг ўзига яраша йўналишлари бор. Анчадан бери бу соҳада ишлаётганим боис ўзимни енгил ҳис қиламан. Клубларда ҳам ўзига яраша иш олиб бориш услублари бор. Тўғриси, буларни ажратмасдим, аммо клуб ва терма жамоа турлича.