“Real” futbolchisi bor aybni o‘z bo‘yniga oldi

Ispaniya chempionatining 25-turidan o‘rin olgan uchrashuvda La Liga peshqadamiga aylangan “Real” futbolchilari Pamplonada “Osasuna” jamoasiga 1:2 hisobida yutqazib qo‘ydi.

Endi chempionlik kurashida madriddliklarni ta’qib qilib kelayotgan “Barselona” bo‘lajak uchrashuvda g‘alaba qo‘zonsa, musobaqa jadvalida “Real”dan yana o‘zib ketish imkoniyatiga ega.

Ta’kidlash joizki, “Osasuna” g‘alaba to‘pini 90-daqiqada kiritdi. Golli hujum “Real” yarim himoyachisi Daniel Sebalyosni to‘p uzatishdagi xatosidan keyin tashkil etildi.

Bahsdan keyin Sebalyos xatosi uchun muxlislarga murojaat qilib, mag‘lubiyat uchun mas’uliyatni o‘z zimmasiga oldi.

- Men mag‘lubiyat uchun javobgarlikni o‘z zimmamga olaman, - deb yozdi Sebalyos ijtimoiy tarmoqdagi sahifasida.

Joriy mavsumda ispaniyalik yarim himoyachi barcha musobaqalarda 22 ta o‘yinda ishtirok etdi va hech qanday samarali harakat qayd etmadi. Futbolchining klub bilan mehnat shartnomasi 2027 yil yozigacha amal qiladi.

Transfermarkt portali ma’lumotiga ko‘ra, Sebalyosning bugungi kundagi transfer bozoridagi qiymati 8 million evroni tashkil etadi.