“Реал” Ҳусановнинг жамоасидан ўйинчи олмоқчи

Келаси мавсум олдидан таркибини сезиларли даражада кучайтиришни мақсад қилган “Реал” ёзда бир неча катта харидларни амалга ошириши кутилмоқда.

Мадридликлар ўтган йили фаолиятини якунлаган Тони Кроос ва тез орада жамоадан кетадиган Лука Модрич ўрнини боса оладиган ўйинчи қидиряпти. Аслида “Қироллик клуби” мутасаддилари майдон марказига “Реал Сосьедад” ярим ҳимоячиси Мартин Субимендини кўзлаган эди. Бироқ испан футболчиси “Арсенал”га ўтишни маъқул топди.

Бу орада “Реал” Бундеслигада “Штутгарт” сафида порлаётган Ангело Штиллернинг имкониятларини ўрганиб чиқди. Клуб селекционерлари жамоа учун муҳим позицияга синовдан ўтган ва катта ўйинларда суяги қотган тажрибали ўйинчи олишга қарор қилди.

AS нашрининг ёзишича, айни пайтда бу позицияга биринчи рақамли нишон “Манчестер Сити”да “Олтин тўп” олган Родри бўлиб турибди. Ҳусановнинг жамоадоши майдон маркази учун идеал вариант ҳисобланади.

“Реал” Родрини трансфер қилиш мураккаб эканини билади. Шу боис, “Қироллик клуби” трансфер нишонлари рўйхатига “Ливерпуль”дан Алексис Мак Аллистер ва “Челси”дан Энцо Фернандесни ҳам қўшди.