“Реал” кутилмаганда “Сити” трансферини барбод қилмоқчи

“Пари Сен-Жермен”нинг италиялик дарвозабони Жанлуижи Доннарумма клубга керак бўлмай қолганидан кейин ўзига янги жамоа излаётган эди.

26 ёшли голкиперга Англия Премьер-лигасининг бир неча клублари оғиз сола бошлади. Нуфузли манбалар “Манчестер Сити” Доннарумма билан келишувга эришгани, “шаҳарликлар” йилига 12 миллион евро маош ажратгани ва дарвозабон АПЛга кўчиб ўтишга розилик бергани ҳақида маълумот тарқатди.

Transfer News Live ва CaughtOffside каби нашрлар “Манчестер Сити” режаларига “Реал” зарба бериши мумкинлиги ҳақида ёза бошлади. Бу икки манбада қайд этилишича, “Қироллик клуби” Жанлуижи Доннаруммани ўз сафига қўшиб олишга қарор қилган.

Мадридликлар италиялик посбон яқин келажакда Тибо Куртуанинг ўрнини босишига қатъий ишонч билдирмоқда.

Айни пайтда Жанлуижи Доннарумманинг ПСЖ билан яна бир йиллик шартномаси бор. Уни қўлга киритишни истаган клуб 40 миллион евро атрофида бадал пули тўлаши талаб этилади.