"Реал" сардори жароҳати сабаб сафдан чиқди

Мадриднинг "Реал" клуби матбуот хизмати ўнг қанот ҳимоячиси Даниэль Карвахалнинг жароҳати ҳақида маълум қилди, унга ўнг оёғининг камбаласимон мушаги шикастлангани ташхиси қўйилган.

COPE хабарига кўра, 33 ёшли футболчи 4 ҳафта майдонга туша олмаслиги мумкин. Бундан келиб чиқиб, мадридликлар сардори "Барселона"га қарши учрашувни ўтказиб юбориш эҳтимоли юқори.

Ўтган йилнинг октябрь ойида испаниялик ҳимоячи хочсимон пайларини узган эди. Карвахал тикланди ва май ойининг охирида майдонга қайтди.

Аввалроқ, "қаймоқранглилар"нинг яна бир ўнг қанот ҳимоячиси Трент Александер-Арнолд жароҳат олганди.

Жорий мавсумда Карвахаль барча мусобақаларда еттита ўйинда майдонга тушди. Футболчининг клуб билан меҳнат шартномаси 2026 йилнинг ёзигача мўлжалланган.