Валверде билан боғлиқ можаро "Реал"да ўзгаришларга сабаб бўлиши мумкин

Мадриднинг "Реал Мадрид" клубида капитанларни танлаш тизими қайта кўриб чиқилиши мумкин.

Ҳозирги қоидага кўра, асосий капитан ва уч нафар вице-капитан биринчи жамоадаги стажи асосида белгиланади. Бироқ "Diario AS" хабарига кўра, клубда бу анъанадан воз кечиш эҳтимоли пайдо бўлган.

Маълум қилинишича, айрим футболчилар ушбу тизим ўзини оқламаган деб ҳисобламоқда ва капитанни жамоа ичидаги овоз бериш орқали танлаш тўғрироқ бўлишини айтмоқда.

Бундай муҳокамаларга вице-капитан Федерико Вальверде билан Орельен Тчуамени ўртасидаги яқинда юз берган жанжал сабаб бўлгани айтилмоқда. Миш-мишларга кўра, айрим футболчилар уругвайлик ярим ҳимоячидан норози бўлиб қолган.

Шунингдек, асосий капитан Даниэль Карвахаль мавсум якунлангач клубни тарк этади. Клуб унинг тугаётган шартномасини узайтирмасликка қарор қилган.