“Реал”да катта ишкал! Тчуамени Вальвердени бир зарба билан шифохонага туширди

Мадриднинг “Реал” жамоаси кийиниш хонасида Федерико Вальверде ва Орельен Тчуамени ўртасида янги можаро юз берди, деб хабар беради Marca нашри.

Испан нашри маълумотига кўра, жамоа ичидаги кескинлик футболчиларнинг аввалги тўқнашувидан кейин ҳам пасаймаган ва вазият янада ёмонлашган. Клуб ичида янги ҳодиса “жуда жиддий” деб баҳоланган.

Хабар қилинишича, футболчилар ўртасидаги можаро эрталабдан бошланган, ўшанда Вальверде Тчуамени билан қўл бериб кўришишдан бош тортган.

Кейинроқ машғулотдан сўнг ўйинчилар ўртасида кийиниш хонасида қаттиқ жанжал келиб чиққан ва унга жамоанинг бошқа футболчилари аралашишга мажбур бўлган. Можаро вақтида уругвайлик ярим ҳимоячи Тчуаменидан кучли зарба қабул қилган ва ёрилиш жароҳати сабаб шифохонага олиб кетилган.

Ҳодисадан кейин “Қироллик клуби” раҳбарияти зудлик билан жамоа йиғилишини ташкил қилди. Клуб машғулот базасига бош директор Хосе Анхель Санчес етиб келган. Манба маълумотига кўра, ҳар икки футболчига нисбатан ички интизомий иш очилган.

Қайд этилишича, машғулотдан кейин футболчилардан ҳеч бири базани тарк этмаган ва клубда жамоа ичидаги таранг муҳитдан жиддий хавотир билдирилмоқда.