"Реал"да яна бир "Галактикос" қуриляпти, Мбаппе бошчилигида кўрилаётган бу таркиб қай кўринишда бўлади? (Таҳлилий мақола)

Мадриднинг "Реал" клуби янги мавсумга жиддий тайёргарликни ҳозирдан бошлаб юборган. Асосий иш сифатида ПСЖ мегаюлдузи Килиан Мбаппенинг "қироллик клуби" сафига кўчиб ўтиш масаласини ҳал қилиш кўрилмоқда. Француз ҳам ёзда парижликлар билан расман хайрлашишини маълум қилди. Демак, Флорентино Перес бошчилигида Мадрид жамоаси раҳбарияти трансферни ижобий томонга ҳал қила оляпти. 

Хўш, алламбало суммалар эвазига сотилмасдан текинга "қаймоқранглилар" аъзосига айланаётган Мбаппе "Реал"га ўтса, таркиб қай кўринишда бўлади? Бош мураббий Карло Анчелотти қандай тактика остида футболчиларни майдонга ташлайди? Кимлар "чопилади" ва яна кимлар ўз ўрнида қолади? Қуйида шу каби саволларга журналист Шоҳрух Зоиров батафсил жавоб беришга уриниб кўради.

Эслатиб ўтамиз, қуйидаги фикрларнинг барчаси ўта шахсий ёндашувлар асосида баён этилмоқда!

4-3-3, классик схема. 

"Реал"нинг доимий ва энг машҳур тактик схемаси. Яқин-яқингача клуб шу тактик жойлашув асосида ўйин намойиш этиб келарди. Бироқ "Олтин тўп"ни қўлга киритган Карим Бенземанинг Мадридни тарк этиши жиддий ўзгаришлар қилишга сабаб бўлди. Анчелотти Каримсиз жамоани 4-3-1-2 схемасида ўйнатишга қарор қилди. Бунда ҳужумчи ортида Жуд Беллингем ҳаракат қилар ва у вақти келганда яққол ҳужумчи чизиғида пайдо бўлишни ҳам эпларди. Жуд олдинга ўтганда Винисиус ва Родриго каби тезкор йигитлар қанотга ўтади ва ўзларининг дриблинги эвазига рақибни янада чалғитишга ҳаракат қилишади. Вальверде, Тчуамени, Камавинга, Кроос, Модрич ёки Себальос сингари марказ вакиллари эса асосан мудофаа ишларига ёрдамлашади. Ишлар яхши бўлмаган пайтда, Карло ота уларни ҳам ҳужумга ташлаши мумкинлигига гувоҳ бўлдик. 

Умуман олганда, Мбаппе келгандан сўнг 4-3-3 схемаси ўта хавфли кўринишда қолаверади. Килиан яққол ҳужумчи сифатида, Вини чап, Родриго эса ўнг қанотдан жой олади. Бу жойлашув амалда фақатгина Беллингем учун зарарга юриши мумкин. Жуд бу тактикада ўзининг эркинлигидан воз кечишига тўғри келади. Шунингдек, англиялик юлдуздан ярим ҳимояда фаолроқ бўлиш талаб этилади. Яъни у ҳужумда эмас, кўпроқ ҳужум ташкил қилишда бош-қошлик қилади. 

4-2-3-1, идеал ечим.

Беллингем ҳужумчи ортида, Вини чап, Родриго ўнг ва Мбаппе олдинги қаторда. Ёш юлдузларнинг барчаси учун жой топиб берилади. Жуд вақти-вақти билан ярим ҳимоя чизиғини ҳам тўлдириб тўлади. Ҳужум бошланган пайтда ҳам фаоллиги билан ҳозирги даражасида ўйин намойиш этиши мумкин. Бразилиялик "учарлар" ҳам ўз қанотида тезлигини хоҳлаганча намойиш эта олади. Бу схема ҳар қандай ҳолатда, хоҳ қарши ҳужум, хоҳ позицион ҳужумда ҳам бирдек хавфли бўлиши билан жуда қулай тактика ҳисобланмоқда.  

Ярим ҳимояда Модрич, Кроос каби ветеранларга чиқиш эшиклари кўрсатилишини инобатга олсак, марказнинг икки футболчига ишониб топширилиши жуда ҳайратланарли эмас. Вальверде, Камавинга, Тчуамени, Себальос ротация асосида "қироллик клуби" ярим ҳимоясига масъул бўлишади. 

4-4-2, содда услуб.

Жорий мавсум "Реал" кўп беллашувларда шу схема остида тўп тепмоқда. Вальверде, Кроос, Модрич, Тчуамени, Камавинга ва Себальос каби футболчилар соф ярим ҳимоячи каби ҳаракат қилади. Ўртада Беллингем эркин ижодкор сифатида ўйнайди. Қанотларда Вини ҳамда Родриго ўз тезлигини ишга солади. Хоселу эса тўққизлик ролида. Энди Хоселу жароҳат олиб, сафдан чиқди. Шу тариқа, "қаймоқранглилар" Вини ва Родригони ҳужумчи ролига чиқаради. Беллингем ҳужумчи ортида, марказда эса уч футболчи ҳаракат қилади. 

Мбаппе келгач, катта эҳтимол билан у ҳужумчи ролига ўтказилади. Унга ҳамкор сифатида Беллингем ёрдам беради. Вини ва Родриго қанотдаги ўз ўрнини эгаллайди.   

Ҳаммага маълумки, Килианнинг "Реал"га келиши жамоани кескин кучайтиради. Бироқ унинг характери ҳисобига футболчилар ичида кичик можаро келиб чиқишини ҳам кўпчилик тилга олмоқда. Шунга қарамай, молиявий ва ўйин услуби томонидан Мадрид жамоаси яхшигина қудратга эга бўлади. Тактик схемаларнинг турфа хиллиги Анчелоттига фойдали бўлиши ҳам эҳтимолдан йироқ эмас. Хуллас, юқорида шунчаки шахсий фикрларимизни ўртоқлашдик. Сиз ҳам изоҳларда ўз фикрларингизни ёзиб қолдиришингиз мумкин!

Шоҳрух Зоиров мақоласи.