“Реал”дагиларнинг “томи” кетиб қолган!

Ла Лига президенти Хавьер Тебас “Реал” раҳбариятининг “Эспаньол” билан ўйиндан кейин Испания Қироллиги футбол федерацияга шикоят аризаси юборганига кескин муносабат билдирди.

Аризада “Қироллик клуби” мутасаддилари мамлакатда ҳакамлик тизимини тўлиқ янгилашни талаб қилган.

- “Реал” мусобақага зиён етказмоқчи. Бу галги шикоят аризаси ҳам шундай далолат беряпти. Улар ўзларини қурбон сифатида кўрсатяпти. Бу эса, ҳақиқатга тўғри келмайди. Хусусан, суриштирув давом этаётган “Негрейра иши”ни ҳам “Реал”дагилар нотўғри талқин қилмоқда.

Негрейра ҳакамларнинг мавқеини ошириш ёки туширишга таъсир кўрсатгани исботланган, лекин унинг ҳакамларга пул тўлагани аниқлангани йўқ. “Реал” эса, қурбон бўлганини таъкидлашдан тўхтамаяпти.

Менича, уларнинг мақсади Ла Лигага зиён етказишдан иборат. Чунки улар берган аризада мусобақа бошидан охиригача нохолис экани иддао қилинаётганини тушуниш мумкин. Уларнинг “томи” кетиб қолибди, - деди Хавьер Тебас.