“Реал”ни қутқарган 18 ёшли Эндрик голларини кимга бағишлади?

“Реал” Испания кубоги доирасида ўтказилган учрашувда “Сельта” билан куч синашди. Нимчорак финал баҳсининг асосий вақти 2:2 ҳисобида дуранг билан якунланди. Қўшимча таймларда мадридликлар меҳмонлар дарвозасини яна уч маротаба ишғол қилиб, кейинги босқичга ўтди.

“Реал”ни қутқарган голлардан иккитасини 79-дақиқада захирадан майдонга тушган Эндрик киритди.

Учрашувдан кейин 18 ёшли бразилиялик футболчи ўз фикрларини билдирди.

• “Реал”да менга ҳамма нарса ёқади, клубнинг ўзи, мухлислар. Голларимни Антонио Рюдигерга бағишлайман, чунки у менга ҳар куни ёрдам беряпти. Мен бу клубга келиб, ҳар қачонгидан кўпроқ меҳнат қилишим кераклигини билардим. Энг яхши ўйинларимни айнан “Реал”да намойиш қилишни истайман, - деди Эндрик.

Ёш истеъдод эгаси 2024 йилнинг июлида “Қироллик клуби”га келиб қўшилган эди. Шу пайтга қадар барча турнирларда 17 маротаба майдонга тушиб, тўртта гол ва битта ассист муаллифи бўлди.