"Roland Garros". Надалда осон, Зверевда қийин ғалаба

"Катта дубулға" туркумига кирувчи навбатдаги мусобақа ҳисобланадиган "Roland Garros" турнирида 2-босқичнинг навбатдаги кун баҳслари ўтказилди.

Дастлабки драматик тўқнашувда германиялик Александр Зверев ҳамда франциялик Пьер-Юг Эрбер ўзаро муносабатларга ойдинлик киритиб олишди. 5 сет давом этган баҳс немис ракетка устасининг иродали ғалабаси билан якунланди. Беллашувни 2:6, 6:4, 7:6, 4:6, 6:4 ҳисобларида ўз фойдасига ҳал қилган Зверев кейинги босқич масаласини мана шундай қийин курашда ютиб олди.

Шунингдек, сараланган теннис усталаридан швейцариялик Стэн Вавринка ҳам 2-босқичда бироз қийинчиликка дуч келди. Германиялик Доминик Кёпферга қарши кортга чиққан тажрибали Вавринка 4 сет давом этган учрашувни ўз фойдасига ҳал қила олди. Якуний ҳисоб: 6:3, 6:2, 3:6, 6:1.

Аксинча, баъзи сараланган ракетка соҳиблари 3-босқич чипталарини ортиқча қийинчиликсиз қўлга киритишди. Хусусан, қумли қопламалм кортлар устаси, дея эътироф этиладиган Рафаэль Надаль америкалик рақиби Маккензи Макдональдга деярли имконият қолдирмади. Ўйин давомида океан орти вакили атиги 4 гэймни "Roland Garros"нинг амалдаги ғолибидан ютиб олишни уддалади. Якуний ҳисоб: 6:1, 6:0, 6:3.

Ушбу турнирда 3-рақам остида сараланган Доминик Тим ҳам бу босқичда катта қийинчиликка дуч келмади. Яна бир америкалик теннисчи Жек Сокка қарши кураш олиб борган австриялик спортчи кейинги босқич масаласини 3 сетда ҳал қила олди. Баҳс Тимнинг 6:1, 6:3, 7:6 ҳисобларидаги ғалабаси билан якунланди.

Аргентиналик Диего Шварцман ҳам турнирдаги ўз юришини давом эттириш ҳуқуқини қўлга киритди. Италиялик Лоренцо Жустино қаршилигини синдира олган Диего ҳам кейинги босқич масаласини 3 сет якунига кўра ҳал қилди. Якуний ҳисоб: 6:1, 7:5, 6:0.

Эртага 2-босқичдан ўрин олган навбатдаги беллашувлар бўлиб ўтади.