"Рома" сафарда дуранг ўйнади. Шомуродов майдонда 66 дақиқа ҳаракат қилди

Италия А Серияси 14-тури доирасидаги "Сассуоло" - "Рома" учрашуви якунига етди. Қизиқарли ва кескин курашлар остида ўтган беллашувда томонлар 1:1 ҳисобида дуранг ўйнашди. 

Учрашувдаги ҳисоб ўйиннинг 80-дақиқасида очилди. Терма жамоамиз аъзоси Элдор Шомуродовнинг ўрнига захирадан майдонга тушган Тэмми Абрахам ўнг қанотдан ошириб берилган тўпни бош билан дарвозага киритиб, жамоасини ҳисобда олдинга олиб чиқди. Орадан 5 дақиқа ўтиб, аниқроғи 85-дақиқада майдон эгалари тезкор қарши ҳужум уюштириб, орадаги фарқни йўққа чиқарди. Гол муаллифи — Андреа Пинамонти.

Учрашувнинг қолган дақиқалари ҳам қизиқарли ўтди, бироқ бошқа гол уриш жамоаларга насиб қилмади - 1:1.

Ушбу дурангдан кейин римликлар 26 очко билан 5-ўринга кўтарилиб олган бўлса, "Сассуоло" 13 очко билан 13-поғонада қолди.